Ստանիսլավսկու անվան ռուսական դրամատիկական թատրոնը տնօրենի նոր պաշտոնակատար ունի

Երևանի Կոնստանտին Ստանիսլավսկու անվան պետական ռուսական դրամատիկական թատրոնը տնօրենի նոր ժամանակավոր պաշտոնակատար ունի: Տնօրենի պարտականությունները կատարող Յուրի Իգիթխանյանն ազատվել է աշխատանքից: Այս մասին այսօր հրավիրված մամուլի ասուլիսում նշեցին Յուրի Իգիթխանյանն ու թատրոնի գեղարվեստական ղեկավար Կարեն Ներսիսյանը:

«Ստանիսլավսկու անվան պետական ռուսական դրամատիկական թատրոնի տնօրենի ժամանակավոր պաշտոնակատար է նշանակվել «Արմմոնո» միջազգային թատերական փառատոնի տնօրեն, դերասանուհի Մարիաննա Մխիթարյանը»,- նշեց Իգիթխանյանը:

Ըստ նրա՝ նոր տնօրենը պաշտոնում կես տարով է նշանակվում, որից հետո նրա լիազորությունները կարող են երեք ամսով երկարացվել, բայց միայն մեկ անգամ:

«Իմ պաշտոնավարման կես տարին լրացել է, մինչ հաջորդ մրցույթը երեք ամիս կար: Ես կարող էի շարունակել մնալ տնօրենի պաշտոնում, սակայն ՀՀ կրթության, գիտության, մշակույթի և սպորտի նախարարությունն այլ բան է որոշել»,- ընդգծեց Յուրի Իգիթխանյանը:

Թատրոնի գեղարվեստական ղեկավար Կարեն Ներսիսյանի խոսքով էլ՝ խնդիրը հենց այդ երեք ամիսների մեջ է, որոնց ընթացքում թատրոնը պետք է տնօրեն ունենա, թեկուզ՝ տնօրենի պաշտոնակատար:

«Իգիթխանյանն աշխատանքից ազատվել է միավորված խոշոր նախարարության այն բաժնի կամ վարչության կողմից, որը մշակույթի հարցերով է զբաղվում և ղեկավարվում է փոխնախարար Արա Խզմալյանի կողմից: Այս կես տարվա ընթացքում, ինչ թատրոնի ղեկավարն եմ, երեք նախարար է փոխվել։ Առաջին երկուսի հետ խնդիրներ չենք ունեցել, սակայն Արա Խզմալյանի հետ մեզ չի հաջողվում հանդիպել, անընդհատ պատասխանում են, որ ժամանակ չկա ու չգիտեն՝ երբ կլինի»,- նշեց Կարեն Ներսիսյանը:

Պարզաբանելով թատրոնի տնօրենի պաշտոնից ազատումը՝ Յուրի Իգիթխանյանը նշեց. «Ես միայն աշխատել եմ, բարեփոխումներ արել, որոնք հանգեցրել են թատրոնի հանդեպ հանդիսատեսի հետաքրքրության աճին։ Ազատվել են նրանք, ովքեր չեն կարող աշխատել նոր պայմաններում»:

Նշենք, որ Ստանիսլավսկու անվան  պետական ռուսական թատրոնում այս օրերին պետք է տնօրենի մրցույթ անցկացվեր: Այդ պաշտոնի համար ընդամենը մեկ թեկնածու լինելու պատճառով մրցույթը չեղյալ հայտարարվեց և երեք ամսով հետաձգվեց:

Նելլի Մելքոնյան