Չպետք է նստել Հայաստանում և ասել՝ լինենք ամենալավ թատրոնը. Համազգային թատրոնի գեղարվեստական ղեկավար

Մեր գլխավոր նպատակն է, որ Համազգայինը դառնա աշխարհի ամենահետաքրքիր թատրոններից մեկը: Չպետք է նստել Հայաստանում և ասել՝ լինենք ամենալավ թատրոնը, պետք է լինել աշխարհի թատերական մթնոլորտի կիզակետում։ Այսօր հրավիրված ասուլիսում նման կարծիք հայտնեց Սոս Սարգսյանի անվան Համազգային թատրոնի գեղարվեստական ղեկավար Նարինե Գրիգորյանը։

Այս տարի թատրոնը ներկայացրել է «Հաղթանակի գենեզիս», «Ճշմարտություն» և «Մինուս երկու» ներկայացումները: Նարինե Գրիգորյանի խոսքով՝ Համազգային թատրոնը նաև  նոր ձևաչափով է հանդես գալիս:

«Նոր ձևաչափը կոչվում է թատերայնացված ընթերցանություն, որի ժամանակ թատերասեր հանրությունը հնարավորություն ունի ծանոթանալ հայ և համաշխարհային ժամանակակից դրամատուրգիային: Սեղանի շուրջ նստած դերասաններն ընթերցում են պիեսը, տեղում խաղում դերը, իսկ ընթերցանությունից անմիջապես հետո տեղի է ունենում քննարկում, որի ընթացքում հանդիսատեսն արտահայտում է իր կարծիքը։ Շատ հետաքրքիր մոտեցում է, արձագանքները միայն դրական են»,- նշեց Նարինե Գրիգորյանը:

Ըստ նրա՝ այս տարի թատրոնում գերակշռում են հայ և ֆրանսիացի գրողների ստեղծագործությունները, հաջորդ տարի ամերիկյան լավագույն պիեսներին են անցնելու: «Տարին ֆրանսիական է ստացվել։ Բայց հուլիսին արդեն ունենք Լևոն Մինասյանի պիեսը՝ «Ժառանգորդը»»,- գեղարվեստական ղեկավարը:

Թատրոնի նորանշանակ տնօրեն Արման Նավասարդյանի խոսքով էլ՝ այս ընթացքում հասցրել են Լիբանանում ու Ռուսաստանում հյուրախաղեր ունենալ: Առաջիկայում ևս  հյուրախաղեր են սպասվում:

Բացի այդ՝ հուլիսին Մոսկվայում մասնակցելու են «Վերածնունդ» փառատոնին, իսկ օգոստոսին՝ Լիտվայում կայանալիք փառատոնին:

Առաջիկայում նաև Հովհաննես Թումանյանի 150 և Սոս Սարգսյանի 90-ամյակներին նվիրված պրեմիերա է լինելու. Թումանյանի «Լոռեցի Սաքոն» ներկայացումը՝ առանց տեքստային փոփոխությունների։ Բացի այդ՝ նաև Գարի Քյոսայանի բենդի հետ «Ջազը թատրոնում» խորագրով համերգ-ներկայացում է նախատեսվում՝ նվիրված Շառլ Ազնավուրին։

Համազգային թատրոնի տնօրեն Արման Նավասարդյանն ընդգծեց, որ ծրագիր ունեն նաև՝ ուղղված մարզերում մշակութային կյանքն ակտիվացնելուն. արդեն հունիսի 5-ին ներկայացում ունեն Գյումրիում, հուլիսին էլ կլինեն Տավուշում:

Նելլի Մելքոնյան