Քննարկում՝ «Հանրակրթությունը նոր փոփոխությունների նախաշեմին» թեմայով (ուղիղ)

Հանրակրթության ոլորտում կառավարությունը մի կողմից օպտիմալացնում է ծախսերը, մյուս կողմից զգալի փոփոխություններ նախաձեռնում դպրոցների ֆինանսավորման ու կառավարման խորհուրդների ձևավորման հարցերում:

2018-2020 թթ. նախատեսվում են նաև բովանդակային փոփոխություններ իրականացնել: Ինչպես վերջերս նշեց ՀՀ կրթության և գիտության նախարար Լևոն Մկրտչյանը, մինչև սեպտեմբերի 20-ը հանրությանը կներկայացվի կրթության զարգացման համալիր ծրագիր մինչ 2030 թվականի համար: «Մենք ձևավորում ենք կրթության այն համակարգը, որը կիրառելի է միայն Հայաստանում»,- ասել է Լևոն Մկրտչյանն ու հավելել, որ այս ուղղությամբ օգոստոսին կավարտվեն քարոզչական քննարկումները, և կսկսվեն սեմինարներն ու վերապատրաստումները:

Կրթական համակարգը ոչ միայն ուղղված է գիտակից, մտածող ու պահանջատեր քաղաքացու դաստիարակությանը, այլեւ ունի ավելի ընդգրկուն առաքելություն: Հենց կրթական համակարգն ու պետական քաղաքականությունն այս ոլորտում մեծ հաշվով կանխորոշում են պետության տնտեսության բնույթը՝ լինել սպասարկող, թե արժեք արտադրող երկիր ու հասարակություն: 

Ի՞նչ փոփոխություններ է կատարում կառավարությունը հանրակրթության համակարգում, ինչպե՞ս դրանք կազդեն համակարգի վրա, վերջապես կարո՞ղ են այդ փոփոխությունները դրական ազդեցություն ունենալ հասարակության մեջ սոցիալական լարվածության թուլացման հարցում: Այս և ոլորտին վերաբերող այլ խնդիրների մասին կխոսենք «Հոդված 3» ակումբում սեպտեմբերի 1-ին ժամը 17:00-ին «Հանրակրթությունը նոր փոփոխությունների նախաշեմին» թեմայով հանրային քնարկմանը: 

Բանախոսներն են կրթության փորձագետ Սերոբ Խաչատրյանը, «Բաց հասարակության հիմնադրամներ – Հայաստան», Կրթության ծրագրի պատասխանատու Լիլիթ Նազարյանը և
 ՀՀ ԱԺ «ԵԼՔ» դաշինքի պատգամավոր, ԱԺ Գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի անդամ Արարատ Միրզոյանը: