Երկու հիվանդանոց կհանվեն մասնավորեցման ցանկից․ Արսեն Թորոսյանը՝ պատճառների մասին. ՏԵՍԱՆՅՈՒԹ

ԱԺ առողջապահության և սոցիալական հարցերի մշտական հանձնաժողովի նիստում քննարկվում է «Պետական գույքի մասնավորեցման 2017-2020 թվականների ծրագրի մասին» օրենքում փոփոխություններ կատարելու մասին օրենքի նախագիծը, որով առաջարկվում է «Ֆանարջյանի անվան ուռուցքաբանության ազգային կենտրոն» ՓԲԸ-ն և «Ֆանարջյանի անվան ուռուցքաբանության ազգային կենտրոն» ՓԲԸ-ն հանել մասնավորեցման ցանկից։

Հիմնական զեկուցող, առողջապահության նախարար Արսեն Թորոսյանը մանրամասն ներկայացրեց, թե որն է նշված հիվանդանոցները մասնավորեցման ցանկից հանելու անհրաժեշտությունը։ Ըստ այդմ՝ «Ֆանարջյանի անվան ուռուցքաբանության ազգային կենտրոն» ՓԲԸ-ն իրականացնում է չարորակ և բարորակ նորագոյացությունների հիվանդանոցային և արտահիվանդանոցային բժշկական օգնություն ու սպասարկում, ուռուցքաբանական հիվանդների դիսպանսեր հսկողություն, ինչպես նաև հանրապետության ողջ տարածքից ուռուցքաբանական հիվանդների վերաբերյալ վիճակագրական տեղեկատվության հավաքագրում: Հանրապետական նշանակության 500 մահճակալանոց պետական հիվանդանոցը` ունի թե ախտորոշիչ, թե բուժական հնարավորություններ: Ներկայում «Ֆանարջյանի անվան ուռուցքաբանության ազգային կենտրոնը» հանրապետությունում գործող և օնկոլոգիական բուժօգնության և հսկողության ծառայություններ մատուցող ամենախոշոր ու բազմապրոֆիլ բժշկական կազմակերպությունն է: Հաշվի առնելով վերջինիս ծավալները, հանրապետությունում օնկոլոգիական հիվանդությունների աճը, ինչպես նաև այն հանգամանքը, որ ներկայում պոտենցիալ ներդրողներ ու կազմակերպությունը ձեռքբերողներ առկա չեն, առավել նպատակահարմար է, որ նշված պրոֆիլի և ծավալների կազմակերպությունը գործի պետական համակարգում ու վերջինիս հնարավոր և ցանկալի զարգացումները անմիջականորեն համակարգվեն ու ուղղորդվեն պետության կողմից:

Ինչ վերաբերում է «Ճառագայթային բժշկության և այրվածքների գիտական կենտրոն» ՓԲԸ-ին, ապա այն իրականացնում է հանրապետական նշանակության գործառույթներ, մասնավորապես՝ կենտրոնը այրվածքային և ճառագայթային հիվանդություններ ունեցող անձանց բժշկական օգնություն ու սպասարկում տրամադրող միակ մասնագիտական ուղղվածության հիմնարկն է, որտեղ տարեկան բուժվում են շուրջ 550-600 քաղաքացի:

Կենտրոնն իրականացնում է մասնագիտական խորհրդատվություններ Երևան քաղաքի և ՀՀ մարզերի բժշկական կենտրոններում, ինչպես նաև ապահովում է ճառագայթային հիվանդությամբ տառապող անձանց շարունակական հսկողությունն ու բուժումը: Ներկայում, Կենտրոնում իրականացվում է շուրջ 3000 հիվանդների շարունակական հսկողություն:

Հաշվի առնելով, որ Կենտրոնն իր պրոֆիլով միակն է ՀՀ-ում, գտնում ենք, որ այն պետք է գործի պետական համակարգում և վերջինիս հնարավոր ու ցանկալի զարգացումները անմիջականորեն համակարգվեն և ուղղորդվեն պետության կողմից:

Մանրամասները՝ տեսանյութում։