Եթե մեր քաղաքացին կաթնամթերք է գնում, պետք է վստահ լինի, որ գնածն իսկապես կաթնամթերք է. վարչապետ. ՏԵՍԱՆՅՈՒԹ

Սպառողների իրավունքների պաշտպանությունը բացարձակ առաջնահերթություն է մեզ համար: Սպառողների իրավունքների պաշտպանության օրվան նվիրված համաժողովին ունեցած ելույթում այս մասին ասաց ՀՀ վարչապետ Նիկոլ Փաշինյանը:

«Երբ խանութներում վաճառվում են խաղալիքներ, քաղաքացին պետք է վստահ լինի, որ պետությունը բավարար չափով ջանք է գործադրել, որ այդ խաղալիքները մեր երեխաների առողջությանը չվնասեն: Երբ խանութում քաղաքացին գնում է կաթնամթերք, քաղաքացին պետք է վստահ լինի, որ իր գնածն իսկապես կաթնամթերք է»,- ասաց վարչապետը:

Անդրադառնալով փողոցային առևտրի թեմային՝ Փաշինյանը նշեց, որ չպետք է առևտրային այդ գործընթացները դիտարկել կամ փոխկապակցել սոցիալական ապահովության և սոցիալական պաշտպանության խնդրի հետ:

«Այս օրերին այդ թեման շատ է շոշափվում: Եթե մենք փողոցներում, մայթերին, օրինակ, մսի առևտուրը հանդուրժենք՝ այն տրամաբանությամբ, որ մենք սոցիալական խնդիր ենք լուծում, նշանակում է՝ մենք հանդուրժում ենք, որ մեր երկիրը պետք է լինի ցածր ստանդարտների երկիր՝ ոչ միայն սպառողների իրավունքների պաշտպանության առումով, այլ նաև սոցիալական պաշտպանության առումով: Որովհետև եթե մեր քաղաքացու սոցիալական պաշտպանության մեթոդը մայթին առևտուր անելն է, նշանակում է՝ մենք այդ քաղաքացուն ասում ենք, որ հենց այդ ստանդարտի սոցիալական պաշտպանություն ենք պատկերացնում քեզ համար: Սա բացարձակապես հարիր չէ մեր երկրին՝ առավել ևս այսօր, առավել ևս երկրում տեղի ունեցած փոփոխություններից հետո»,- նշեց Նիկոլ Փաշինյանը:

Մանրամասները՝ տեսանյութում:

Լիլիթ Շաբոյան