Յուրի Խաչատուրովն էլ նստած սպասում է․ Վճռաբեկի վճիռը չկա ու չկա

Հատուկ քննչական ծառայությունը  2018-ի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների հետ կապված 2018 թվականի հուլիսի 26-ին ՀԱՊԿ գլխավոր քարտուղար Յուրի Խաչատուրովին մեղադրանք առաջադրեց ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:

Յուրի Խաչատուրովի նկատմամբ դատարանը կիրառեց այլընտրանքային խափանման միջոց և ազատեց նրան 5 մլն դրամ գրավի դիմաց։ Այնուհետև սահմանադրական կարգի տապալման համար մեղադրվող Յուրի Խաչատուրովն ազատվեց Հավաքական անվտանգության պայմանագրի կազմակերպության գլխավոր քարտուղարի պաշտոնից:

«Համաձայն սահմանված կարգի՝ Հավաքական անվտանգության պայմանագրի կազմակերպության գլխավոր քարտուղարի պաշտոնից Հայաստանի Հանրապետության ներկայացուցիչ Յուրի Գրիգորի Խաչատուրովի վաղաժամկետ հետկանչի ընթացակարգն ավարտվել է: ՀԱՊԿ Հավաքական անվտանգության խորհրդի որոշմամբ Յու․ Գ․ Խաչատուրովը ազատվել է Կազմակերպության Գլխավոր քարտուղարի պաշտոնից», – հայտնեց կազմակերպության պաշտոնական կայքը։

Ավելի ուշ՝ դեկտեմբերի 6-ին, ռազմաքաղաքական այդ կառույցի գլխավոր քարտուղարի պարտականությունները ստանձնեց գլխավոր քարտուղարի տեղակալ Վալերի Սեմերիկովը և Հայաստանը փաստացի զրկվեց ՀԱՊԿ գլխավոր քարտուղարությունից: Յուրի Խաչատուրովի նկատմամբ հարուցված քրեական գործին իրար արագ-արագ հաջորդող զարգացումները, սակայն վերջին 4-5 ամիսների ընթացքում կանգ են առել։

Factor.am-ի հետ զրույցում Յուրի Խաչատուրովի պաշտպան Միհրան Պողոսյանը նշեց, որ Յուրի Խաչատուրովի նկատմամբ կալանավորումը թույլատրելի ճանաչելու վերաբերյալ Առաջին ատյանի դատարանի որոշման դեմ բողոք է ներկայացրել Վերաքննիչ դատարան, դատարանը մերժել է բողոքը, որից հետո ներկայացվել է Վճռաբեկ բողոք, որը վարույթ ընդունելու կամ չընդունելու մասին դատարանը պետք է որոշում կայացներ եռամսյա ժամկետում։

«Այդ ժամկետը լրացել է 2018 թվականի դեկտեմբերի 18-ին, բոլոր հնարավոր և անհնար ժամկետներն ավարտվել են, սակայն մինչ այս պահը Վճռաբեկ դատարանից որևէ նորություն չունենք»,- ասաց Պողոսյանը։

Ըստ պաշտպանի՝ Յուրի Խաչատուրովի նկատմամբ հարուցված քրգործի վերաբերյալ հասարակական ընկալումը իրավական գնահատականից շատ մեծ տարբերություն ունի։ «Բոլորին է ակնհայտ, որ այստեղ եղել է անօրինական միջամտություն, և կալանքը կրել է օրենքով չնախատեսված հիմք, անձին ցանկացել են կալանավորել, որ նա սկսի խոսել կամ առնվազն ցուցմունք տա․ հասարարական ընկալումն այսպիսին է, իսկ դրան իրավական գնահատական տալու պարագայում պետք է լինեն դրանից բխող իրավական գործողություններ։ Կարծում եմ՝ դա կաշկանդում է Վճռաբեկ դատարանին, որպեսզի նա որոշում կայացնի»,- ասաց պաշտպանը՝ հավելելով, որ Յուրի Խաչատուրովն արդեն ամիսներ շարունակ գտնվում է Հայաստանում, անձնագիրն իր մոտ է, երկրից դուրս գալու որևէ ցանկություն չունի և նստած սպասում է։

Թե ո՞րն է Յուրի Խաչատուրովի նկատմամբ հարուցված քրեական գործի շուրջ վերջին ամիսների պասիվության պատճառը, գործի նախաքննությունը շարունակվո՞ւմ է, թե՝ ոչ, փորձեցինք պարզել նրան մեղադրանք առաջադրած մարմնից՝ Հատուկ քննչական ծառայությունից։ Ծառայության մամուլի խոսնակ Մարինա Օհանջանյանը մեզ հետ զրույցում նշեց․ «Յուրի Խաչատուրովի գործով նախաքննությունը շարունակվում է և նախաքննական մարմնի շահերից է բխում այս պահին հարցի վերաբերյալ որևէ մեկնաբանություն չանելը»։

Աղավնի Սուքիասյան