Սանտայի գաղտնի գործակալները՝ Լեզվի կոմիտեում․ ՏԵՍԱՆՅՈՒԹ

Հունվարի 15-ին Լեզվի կոմիտեի նախագահ Դավիթ Գյուրջինյանի հրավերով Երևանի տարածաշրջանային N1 պետական քոլեջի տնօրեն Պարույր Սանթրոսյանը և քոլեջի 3-րդ կուրսի ուսանողների մի խումբ հյուրընկալվեցին Լեզվի կոմիտեում: Հանդիպմանը ներկա էր Լեզվի կոմիտեի նախագահի տեղակալ Մարատ Յավրումյանը: Այս մասին հայտնում են Լեզվի կոմիտեից։
2018թ. դեկտեմբերին քոլեջի ուսանողներ Արտավազդ Կլեկչյանի, Սոնա Սարիբեկյանի, Արտյոմ Մելքոնյանի, Ռաֆֆի Մազմանեանի և Ժաննա Քոչարյանի ուժերով հայերեն կրկնօրինակվել և համացանցի միջոցով հայ հասարակության դատին էր հանձնվել «Սանտայի գաղտնի գործակալները» հանրահայտ մուլտֆիլմը: Ամերիկյան կարճամետրաժ մուլտֆիլմը հայերենացնելու գաղափարը հղացել էր ապագա ռեժիսորներ Սոնայի և Ժաննայի մտքում, նրանք էլ թարգմանել էին տեքստը:
Սոնա Սարիբեկյանը նշեց, որ Հայաստանում Ամանորին նվիրված հայերեն մուլտֆիլմերը քիչ են, և հենց այդ պատճառով իրենք որոշեցին ուսումնառության գործընթացի մաս կազմող այդ աշխատանքն ավարտել Նոր տարվա շեմին:
Դավիթ Գյուրջինյանը գնահատեց քոլեջի սաների աշխատանքը և գրագետ ու բնական հայերեն խոսքը: Նա հույս հայտնեց, որ համաշխարհային հայտնի մուլտֆիլմերի կրկնօրինակման աշխատանքները կշարունակվեն, և հեղինակային իրավունքի հարցը լուծելուց հետո հայերեն տարբերակները կցուցադրվեն նաև հայկական հեռուստաալիքներով: Լեզվի կոմիտեի նախագահը նշեց, որ արժե հայերենացնել հայկական այն մուլտֆիլմերը, որոնք ռուսերեն են:
Քոլեջի տնօրեն Պարույր Սանթրոսյանը շնորհակալություն հայտնեց Լեզվի կոմիտեի նախագահին՝ քոլեջի ուսանողների աշխատանքը գնահատելու, նրանց խրախուսելու և ջերմ ընդունելության համար: Նա նշեց, որ պետական մարմնի ուշադրությունը ոգևորություն է առաջացրել քոլեջի ուսանողների շրջանում:
«Սա մուլտֆիլմ կրկնօրինակելու մեր ուսանողների առաջին փորձն է, ամբողջ աշխատանքը իրենք են կատարել, քոլեջը միայն պայմաններ ու անհրաժեշտ մթնոլորտ է ստեղծել»,- նշեց Պ. Սանթրոսյանը:
Քոլեջի ուսանողներին Լեզվի կոմիտեի նախագահի տեղակալ Մարատ Յավրումյանն առաջարկեց ռեժիսորական ու դերասանական հմտությունները փորձել նաև աուդիոգրքերի և ռադիոբեմադրությունների պատրաստման ոլորտում, իսկ հետագայում դրանք տարածել բջջային հավելվածների միջոցով:
Հանդիպման ավարտին Դ. Գյուրջինյանը քոլեջի ուսանողներին նվիրեց «Լեզվաշխարհ» ամսագրի հավաքածուն, իսկ քոլեջի գրադարանին՝ մեծահռչակ դերասան Վահրամ Փափազյանի երկերի հինգհատորյակը և սիրով ընդունեց տնօրենի հրավերը՝ ներկա լինելու քոլեջի ուսանողների բեմադրած որևէ ներկայացման:

Տեսանյութում՝ «Սանտայի գաղտնի գործակալները»  մուլտֆիլմի հայերեն տարբերակը