07.09.2026 | 15:32
Աղիքային վարակի գանգատներով 3 անձ Բյուրեղավանից հոսպիտալացվել է «Աբովյան» ԲԿ-ում
NYT. Քրդական ուժերը պատրաստվում են Իրան հնարավոր ներխուժման. ըստ որոշ աղբյուրների՝ հարձակումը սկսվել է
Քաղաքականություն
05.03.2026 | 17:51
Իրաքում տեղակայված և ԱՄՆ-ի կողմից աջակցվող քրդական ուժերը պատրաստում են զինված ստորաբաժանումներ, որոնք կարող են ներխուժել Իրան՝ ստեղծելով արդեն իսկ ընդլայնվող հակամարտության նոր ճակատ։ Այս մասին հաղորդում է The New York Times-ը՝ հղում անելով իրաքցի պաշտոնյաներին և իրանական քրդական խմբավորումների բարձրաստիճան անդամներին, գրում է BBC-ի ռուսական ծառայությունը։
NYT-ը նշում է, որ ԿՀՎ-ն նախկինում Իրանի քրդական ուժերին զենք է մատակարարել՝ որպես Իրանն ապակայունացնելու գաղտնի ծրագրի մաս, սակայն դա տեղի է ունեցել մինչև ներկայիս պատերազմի սկսվելը։
Միաժամանակ, Սպիտակ տան մամուլի քարտուղար Քերոլայն Լիվիթը չորեքշաբթի հայտարարել է, որ տեղեկությունները, թե նախագահ Դոնալդ Թրամփը համաձայնել է Իրանում քրդական ապստամբության ծրագրին, «բացարձակապես կեղծ» են։
Ըստ NYT-ի՝ ԱՄՆ-ի ցանկացած ջանք՝ օգնելու քրդերին Իրան ներխուժելու կամ այնտեղ որևէ ապստամբություն իրականացնելու հարցում, պատերազմում անսպասելի շրջադարձի կբերի։ Սակայն եթե ներխուժումը բավականաչափ մեծ լինի, դա կստիպի իրանական ուժերին արձագանքել՝ թույլ տալով ամերիկյան կամ իսրայելական ինքնաթիռներին հարվածել նրանց։
Իսրայելական i24NEWS-ն էլ հայտնում է, թե իրանական Քուրդիստանի քաղաքական ուժերի կոալիցիայի (CPFIK) պաշտոնյան հայտարարել է, որ Իրաքում տեղակայված քրդական զինված խմբավորումներն արդեն սկսել են ռազմական հարձակում իրանական ռեժիմի ուժերի դեմ։ Պաշտոնյայի խոսքով՝ «Քուրդիստանի ազատ կյանքի կուսակցության» (PJAK) հետ կապված քուրդ մարտիկները մարտի 2-ին սկսել են մարտական դիրքեր գրավել Իրանի տարածքում։
«Քրդական ուժերի կողմից Իրանի դեմ ցամաքային ռազմական շարժումները սկսվել են մարտի 2-ի կեսգիշերից»,- i24NEWS-ին ասել է պաշտոնյան։
Նրա խոսքով՝ իրանական ուժերը մարտի 3-ին տարհանվել են սահմանային Մարիվան քաղաքից և սկսել են պաշտպանական դիրքեր հաստատել տարածքում և շրջակայքում։
CPFIK-ի պաշտոնյայի խոսքով՝ PJAK-ի զինյալները տեղափոխվել են Իրանի արևմուտքում գտնվող Մարիվանի հարավային լեռների շուրջը գտնվող դիրքեր։ Նա ասել է, որ PJAK-ի հազարավոր զինյալներ արդեն տեղակայված են Իրանի լեռնային շրջաններում, մասնավորապես, Զագրոսի լեռների խորքում։
Իրանական Tasnim լրատվական գործակալությունը, իր հերթին, հայտնել է, որ սահմանամերձ երեք նահանգներից իր լրագրողները հերքել են Իրաքից Իրան քուրդ զինյալների անցնելու մասին հաղորդումները՝ հերքելով տարածաշրջանային լրատվամիջոցներում շրջանառվող պնդումները սահմանային հարձակումների կամ քրդական զինված խմբավորումների տեղաշարժերի մասին։
Թարգմանությունը՝ Էմմա Չոբանյանի
