«Զարմացած եմ այն ամենով, ինչ տեսա այստեղ». Լևան Կոբիաշվիլին՝ «Յուվենտուսի» հայաստանյան ակադեմիայի մասին

Վրաստանի ֆուտբոլի ֆեդերացիայի նախագահ Լևան Կոբիաշվիլին սեպտեմբերի 30-ին Երևանում մասնակցել է Թուրինի «Յուվենտուսի» հայաստանյան ֆուտբոլային ակադեմիայի բացման հանդիսավոր արարողությանը: Գերմանական «Շալկեի», «Ֆրայբուրգի», «Հերտայի» ու Վրաստանի հավաքականի նախկին ֆուտբոլիստն ընդգծել է, որ այս նախագիծը կարևոր է հայկական ֆուտբոլի զարգացման համար, հաղորդում է Factor TV-ի թղթակիցը:

«Շատ ուրախ եմ այստեղ գտնվելու համար: Զարմացած եմ այն ամենով, ինչ տեսա այստեղ: Շատ ուրախ եմ, որ Երևանում նման ակադեմիա է կառուցվել: Սա շատ կարևոր է հայկական ֆուտբոլի զարգացման համար: Այս ամենը շատ հաճելի է նաև Վրաստանի ու տարածաշրջանի համար: Ի սրտե շնորհավորում եմ ու մաղթում լավագույնը ոչ միայն այս ակադեմիային, այլև ամբողջ հայկական ֆուտբոլին»,- նշել է անվանի ֆուտբոլիստը:

«Յուվենտուսի» հայաստանյան ակադեմիայի բացման արարողությանը մասնակցել են նաև Երևանի քաղաքապետ Տիգրան Ավինյանը, ԿԳՄՍ նախարար Ժաննա Անդրեասյանը, Հայաստանում Իտալիայի արտակարգ և լիազոր դեսպան Ալեսանդրո Ֆերանտին, ՀՖՖ նախագահ Արմեն Մելիքբեկյանը, «Յուվենտուսի» ու Իտալիայի հավաքականի նախկին հարձակվող Ֆաբրիցիո Ռավանելին, ՈՒԵՖԱ-ի գլխավոր քարտուղար Թեոդոր Թեոդորիդիսը, «Յուվենտուսի» գլխավոր բիզնես տնօրեն Պետեր Սիլվերստոնը և այլք:

«Յուվենտուսի» հայաստանյան ակադեմիան Երևանում ունի երկու մարզաբազա, առաջինը՝ Ավան վարչական շրջանում (Աճառյան 20/4), երկրորդը՝ «Հրազդան» ստադիոնի հարևանությամբ (Ծիծեռնակաբերդի խճուղի 2/3)։ «Հրազդան» ստադիոնի հարևանությամբ գործող մարզաբազայում կառուցվել է նաև ՈՒԵՖԱ-ի երկրորդ կատեգորիայի ստանդարտներին համապատասխան Freedom Arena մարզադաշտը, որը հյուրընկալում է շուրջ 2000 հանդիսական: Սեպտեմբերի 30-ի երեկոյան կկայանա նաև Freedom Arena-ի բացման արարողությունը, որին կմասնակցի նաև ՀՀ վարչապետ Նիկոլ Փաշինյանը:

Սեպտեմբերի 30-ին կայացել է նաև Նոր Հաճն քաղաքում կառուցվող սպորտային թաղամասի ու երրորդ մասնաճյուղի հիմնարկեքի արարողությունը:

Դավիթ Եղիազարյան