Ֆաբրիցիո Ռավանելի. ««Յուվենտուսի» հայաստանյան ակադեմիան լավագույնն է աշխարհում»

Սեպտեմբերի 30-ին անցկացվում են Թուրինի «Յուվենտուսի» հայաստանյան ֆուտբոլային ակադեմիայի երկու մասնաճյուղերի բացման արարողությունները, ինչպես նաև Նոր Հաճն քաղաքում կառուցվող երրորդ մասնաճյուղի հիմնարկեքի արարողությունը: Միջոցառումներին մասնակցելու համար Հայաստան ժամանած պատվավոր հյուրերի թվում է նաև «Յուվենտուսի» ու Իտալիայի հավաքականի նախկին հարձակվող Ֆաբրիցիո Ռավանելին: Իր խոսքում անվանի ֆուտբոլիստը հիացմունք է հայտնել երևանյան ակադեմիաների վերաբերյալ, հաղորդում է Factor TV-ի թղթակիցը:

«Ֆանտաստիկ տպավորություններ ունեմ Հայաստանից: Սա իմ առաջին այցն է այս երկիր, քաղաքը հիանալի է, եղանակն ու մարդիկ՝ նույնպես: Հուսով եմ՝ Հայաստան կժամանեմ նաև ընտանիքիս հետ:

Անկեղծ կլինեմ, ես եղել եմ աշխարհի տարբեր ծայրերում ու այցելել «Յուվենտուսի» ակադեմիաներ Ճապոնիայում, Չինաստանում, ԱՄՆ-ում ու այլ երկրներում, սակայն ես առաջին անգամ եմ տեսնում նման նախագիծ: Այս ամենը ֆանտաստիկ է: Կարծում եմ՝ սա այս պահին «Յուվենտուսի» լավագույն ակադեմիան է աշխարհում»,- ասել է Ֆաբրիցիո Ռավանելին:

«Յուվենտուսի» հայաստանյան ակադեմիայի բացման արարողությանը մասնակցել են նաև Երևանի քաղաքապետ Տիգրան Ավինյանը, ԿԳՄՍ նախարար Ժաննա Անդրեասյանը, Հայաստանում Իտալիայի արտակարգ և լիազոր դեսպան Ալեսանդրո Ֆերանտին, ՀՖՖ նախագահ Արմեն Մելիքբեկյանը, Վրաստանի ֆուտբոլի ֆեդերացիայի նախագահ Լևան Կոբիաշվիլին, ՈՒԵՖԱ-ի գլխավոր քարտուղար Թեոդոր Թեոդորիդիսը, «Յուվենտուսի» գլխավոր բիզնես տնօրեն Պետեր Սիլվերստոնը և այլք:

«Յուվենտուսի» հայաստանյան ակադեմիան Երևանում ունի երկու մարզաբազա, առաջինը՝ Ավան վարչական շրջանում (Աճառյան 20/4), երկրորդը՝ «Հրազդան» ստադիոնի հարևանությամբ (Ծիծեռնակաբերդի խճուղի 2/3)։ «Հրազդան» ստադիոնի հարևանությամբ գործող մարզաբազայում կառուցվել է նաև ՈՒԵՖԱ-ի երկրորդ կատեգորիայի ստանդարտներին համապատասխան Freedom Arena մարզադաշտը, որը հյուրընկալում է շուրջ 2000 հանդիսական: Սեպտեմբերի 30-ի երեկոյան կկայանա նաև Freedom Arena-ի բացման արարողությունը, որին կմասնակցի նաև ՀՀ վարչապետ Նիկոլ Փաշինյանը:

Սեպտեմբերի 30-ին կայացել է նաև Նոր Հաճն քաղաքում կառուցվող երրորդ մասնաճյուղի հիմնարկեքի արարողությունը:

Դավիթ Եղիազարյան