Թրամփը հայտարարել է, որ Իրանը բախվում է «էպիկական մասշտաբների մարդասիրական ճգնաժամի»

ԱՄՆ նախագահ Դոնալդ Թրամփը երեքշաբթի մեղադրել է Իրանին երկրի զինված ուժերի մեծ մասին աշխատավարձ չվճարելու և ցուցարարներին սպանելու մեջ՝ իրավիճակը բնութագրելով որպես «էպիկական մասշտաբների հումանիտար ճգնաժամ»։ Այս հայտարարությունը հնչել է այն ժամանակ, երբ ԱՄՆ-ը շարունակական պատերազմի պայմաններում ուժեղացնում է ճնշումը Թեհրանի նկատմամբ, գրում է CNN-ը։

«Ձախողվող Իրանի Իսլամական Հանրապետությունը չի վճարում իր զինված ուժերի մեծ մասի աշխատավարձը, միաժամանակ սպանում է ցուցարարներին, նույնիսկ այն դեպքում, երբ նրանք չեն բողոքում՝ նախկինում չտեսնված մասշտաբներով։ Սա հումանիտար ճգնաժամ է՝ էպիկական  մասշտաբների, և այն պետք է կանգնեցվի՝ ՀԻՄԱ»,- գրել է Թրամփը Truth Social-ում։

ԱՄՆ նախագահն իր պնդումներին որևէ ապացույց չի ներկայացրել։ Միաժամանակ, 2026 թվականի հունվարին Իրանում տեղի ունեցած ապստամբությունն ուղեկցվել է լայնածավալ բռնությամբ, իսկ իրավապաշտպանների զեկույցները շարունակում են ընդգծել այլախոհների առջև ծառացած լուրջ վտանգները։

Թրամփի գրառումն արվել է այն ժամանակ, երբ ԱՄՆ-ն ակտիվացրել է Իրանի դեմ տնտեսական ճնշման արշավը, այդ թվում՝ «Տնտեսական մեկուսացում» գործողության մեկնարկը, որը Թրամփն անվանել է «տնտեսական D-Day»՝ Իրանի հետ գրեթե վեց ամիս տևած ռազմական հակամարտության ֆոնին։

ԱՄՆ ֆինանսների նախարար Սքոթ Բեսենթը երկուշաբթի սպառնացել էր նոր պատժամիջոցներ կիրառել այն երկրների նկատմամբ, որոնք հրաժարվում են խզել տնտեսական կապերն Իրանի հետ, չնայած չի հայտարարել նոր խոշոր պատժամիջոցների մասին։

Թարգմանությունը՝ Էմմա Չոբանյանի