Սոցիալական ցանցերում տարածվել է «Ուժեղ Հայաստան» կուսակցության առաջնորդ Սամվել Կարապետյանի լուսանկարը՝ հետևյալ գրառմամբ. «Պետք է ամեն գնով օգնենք մեր դաշնակից Ռուսաստանին՝ Ուկրաինայի դեմ պատերազմում»։
Լուսանկարը՝ «Սրտացավ Հայաստան» ֆեյսբուքյան էջից
Այս լուսանկարն առաջին անգամ տարածվել է մայիսի 2-ին՝ «Սրտացավ Հայաստան» ֆեյսբուքյան էջի կողմից։ Այն ունի ավելի քան 5000 հավանում, 308-ից ավելի տարածում և շուրջ 1700 մեկնաբանություն։
Սամվել Կարապետյանի լուսանկարը վերցված է 2021 թ. «Sputnik Արմենիա»-ին տված նրա հարցազրույցից։ «Սրտացավ Հայաստան» ֆեյսբուքյան էջը հրապարակման մեջ չի նշել որևէ աղբյուր, թե երբ և որտեղ է Կարապետյանը նման հայտարարություն արել։
Factor TV-ն բաց աղբյուրներով ուսումնասիրել է Սամվել Կարապետյանի վերջին հայտարարությունները և նման որևէ ձևակերպում չի հայտնաբերել։
Մեզ հետ զրույցում «Ուժեղ Հայաստան» կուսակցության մամուլի քարտուղար Մարիաննա Ղահրամանյանը նշեց, որ տարածվող տեղեկությունն ապատեղեկատվություն է, և այդ էջն իրենց հետ որևէ կապ չունի։
«Այդ էջը ֆեյք է. վերջերս բացված էջ է և որևէ կապ չունի «Ուժեղ Հայաստան» կուսակցության և, առհասարակ, մեր համակիրների կամ մեր պաշտոնական կամ նույնիսկ ոչ պաշտոնական ֆան էջերի հետ»,- ասաց Մարիաննա Ղահրամանյանը:
«Սրտացավ Հայաստան» ֆեյսբուքյան էջը պարբերաբար տարածում է կեղծ լուրեր։ Դեռ ապրիլի 10-ին նրանք տարածել էին մի կարճ տեսանյութ, որտեղ Սամվել Կարապետյանը, իբր, սեղմում է ՀՀ երկրորդ նախագահ Ռոբերտ Քոչարյանի ձեռքը։
Factor TV-ն ավելի վաղ ստուգել էր այդ տեսանյութը և պարզել, որ այն գեներացված է արհեստական բանականության միջոցով։
Բացի այդ, նույն էջը տարածել էր լուսանկար՝ նշելով, թե ապրիլի 11-ին Ազատության հրապարակում կայացած հանրահավաքին մասնակցել է ավելի քան կես միլիոն մարդ, ինչը ևս կեղծիք է։
«Սրտացավ Հայաստան» էջն ունի 2100 հետևորդ, առաջին հրապարակումն արվել է այս տարվա փետրվարի 25-ին։ Էջում, բացի նշված հրապարակումներից, առկա են նաև «Ուժեղ Հայաստան» դաշինքի անդամների լուսանկարները՝ աջակցող գրառումներով։
Լուսանկարը՝ «Սրտացավ Հայաստան» ֆեյսբուքյան էջից
Հատկանշական է, որ այս լուրը տարածվել է մայիսի 2-ին, երբ արդեն հաստատված էր, որ հաջորդ օրը Ուկրանիայի նախագահ Վլադիմիր Զելենսկին ժամանելու է Հայաստան։
Մարիա Խաչատրյան
