Սամվել Կարապետյանի և Ռոբերտ Քոչարյանի մասնակցությամբ տեսանյութը կեղծ է․ ուժերը չեն միավորվել

Արդեն մի քանի օր է՝ Facebook-ի հայկական տիրույթում տարածվում է «Ուժեղ Հայաստան» կուսակցության նախագահ Սամվել Կարապետյանի և «Հայաստան» դաշինքի առաջնորդ Ռոբերտ Քոչարյանի մասնակցությամբ մի տեսանյութ և դրանից առանձնացված լուսանկար։ Դրանում երևում է՝ ինչպես են Կարապետյանը և Քոչարյանը միմյանց ձեռք սեղմում։ Նկարագրության մեջ նշված է․ «Վերջապեսսսս»։

Նշենք սակայն, որ քաղաքական այս ուժերը միանալու կամ համագործակցելու վերաբերյալ մինչև օրս որևէ հայտարարություն չեն արել։

Հրապարակման սկզբնաղբյուրը վերջերս բացված «Սրտացավ Հայաստան» ֆեյսբուքյան էջն է։

Factor TV-ն AI դետեկտորների միջոցով պարզել է, որ տեսանյութը և, համապատասխանաբար, դրանից առանձնացված լուսանկարը գեներացվել են արհեստական բանականության միջոցով։

Էջում առաջին հրապարակումն արվել է փետրվարի 25-ին։ Factor TV-ի հետ զրույցում «Ուժեղ Հայաստանի» մամուլի քարտուղար Մարիաննա Ղահրամանյանը հայտնեց՝ տեսանյութը հրապարակած էջը իրենց կողմից չի ստեղծվել, Սամվել Կարապետյանն ու Ռոբերտ Քոչարյանն իրար հետ չեն հանդիպել։

«Տեսել ենք այդ էջը, փորձել ենք բողոքներ ուղարկել Facebook-ի միջոցով, սակայն այն դեռ չի արգելափակվել։ Բովանդակությունը կեղծ է»,-նշեց նա։

«Սրտացավ Հայաստան» ֆեյսբուքյան էջը ողողված է Նարեկ Կարապետյանի և Սամվել Կարապետյանի լուսանկարներով։ Ապրիլի 11-ին Ազատության հրապարակում կուսակցության հանրահավաքի վերաբերյալ ևս կեղծ լուր է տարածվել էջում։ Նշված է, թե դրան կես միլիոն մարդ է մասնակցել, մինչդեռ «Իրազեկ քաղաքացիների միավորումն» աերոնկարահանման միջոցով իրականացրել է հավաքի մասնակիցների հաշվարկ, որի արդյունքում պարզել է, որ 18:05-ի դրությամբ հանրահավաքի անցկացման վայրում և հարակից տարածքներում գտնվել է շուրջ 12,500 մարդ:

Չնայած նրան, որ էջն ընդամենը 56 հետևորդ ունի, Կարապետյանի և Քոչարյանի մասնակցությամբ տեսանյութը 890 հազար դիտում, 3000-ից ավելի հավանում ունի։ Հրապարակման համար ֆեյսբուքյան էջում գովազդ էր միացվել։

Ավելի վաղ հայտարարվել է, որ «Ուժեղ Հայաստան» կուսակցությունը հունիսի 7-ի խորհրդարանական ընտրություններին ընդառաջ դաշինք է կազմել «Նոր դարաշրջան» և «Միավորված հայեր» կուսակցությունների հետ։

Իսկ «Հայաստան» դաշինքի պաշտոնապես հայտարարված կազմում են՝ Հայ հեղափոխական դաշնակցությունը և «ԱռԱջ» կուսակցությունները։

Եվգենյա Համբարձումյան