10.06.2026 | 23:29
Հունիսի 7-ին կայացած ԱԺ ընտրությունները աննախադեպ էին. «Նոր ուժ»-ի հայտարարությունը
Էրդողանը հրավիրվել է Երևանում Եվրոպական քաղաքական համայնքի հանդիպմանը. մասնակցությունը պարզ կդառնա առաջիկա օրերին. BBC
Քաղաքականություն
30.04.2026 | 15:28
Թուրքիայի նախագահ Ռեջեփ Թայիփ Էրդողանը հրավիրվել է Եվրոպական քաղաքական համայնքի (ԵՔՀ) հանդիպմանը․ կազմակերպություն, որը ստեղծվել է եվրոպական երկրների միջև ռազմավարական մերձեցումը, համագործակցությունը, երկխոսությունը և համակարգումը խթանելու համար։
Հանդիպումը տեղի կունենա մայիսի 4-ին Հայաստանի մայրաքաղաք Երևանում։ «Ապագայի կառուցում. միասնություն և կայունություն Եվրոպայում» թեմայով հանդիպումը կնախագահեն Եվրամիության (ԵՄ) Խորհրդի նախագահ Անտոնիո Կոշտան և ՀՀ վարչապետ Նիկոլ Փաշինյանը։ Կազմակերպվելով խորը աշխարհաքաղաքական փոփոխությունների ժամանակաշրջանում՝ հանդիպման հիմնական թեմաներն են ժողովրդավարական դիմադրողականության բարձրացումը, կապի ամրապնդումը և տնտեսական ու էներգետիկ անվտանգության ամրապնդումը, ասվում է BBC-ի թուրքական ծառայության անդրադարձում։
Ընդգծվում է, որ Թուրքիան մասնակցել է առաջին գագաթնաժողովին, որը տեղի է ունեցել Պրահայում (Չեխիա) 2022 թվականի հոկտեմբերի 6-ին։ Էրդողանը մասնակցել է նաև 2024-ի նոյեմբերի 7-ին Բուդապեշտում (Հունգարիա) և 2025-ի մայիսի 16-ին Տիրանայում (Ալբանիա) կայացած հանդիպումներին։ Եվ չնայած 2023 թվականին Իսպանիայում և Մոլդովայում, 2024 թվականին Միացյալ Թագավորությունում և 2025 թվականին Դանիայում կայացած հանդիպումներին հրավիրված լինելուն՝ նա դրանց չի մասնակցել։
Թուրքիայից պաշտոնական հայտարարություն չի եղել այն մասին՝ արդյո՞ք Էրդողանը կմասնակցի երևանյան հավաքին։
«Դեռ վաղ է ասել՝ արդյո՞ք Էրդողանը կմասնակցի։ Մասնակիցների ցուցակը դեռևս վերջնականապես չի որոշվել։ Նրա մասնակցությունը պարզ կդառնա առաջիկա օրերին»,- ասել է ԵՄ պաշտոնյան։
Եթե Էրդողանը չմասնակցի երևանյան գագաթնաժողովին, Թուրքիան ներկայացված չի լինի։ Կանոնների համաձայն՝ հանդիպմանը կարող են մասնակցել միայն պետությունների և կառավարությունների ղեկավարները։ Նախարարական կամ ավելի ցածր մակարդակով ներկայացուցչություն չի ընդունվում։
BBC-ն ընդծում է, որ այս հանդիպումն ուշագրավ է, քանի որ համընկնում է այն ժամանակահատվածի հետ, երբ քայլեր են ձեռնարկվում Թուրքիայի և Հայաստանի միջև հարաբերությունների կարգավորման ուղղությամբ։ ԵՄ-ն, որն աջակցում է երկու երկրների միջև հարաբերությունների լիարժեք կարգավորմանը, կարծում է, որ «հայ-թուրքական կարգավորման գործընթացում այս կայուն ընթացքն արտացոլում է տարածաշրջանում արմատավորվող ավելի լայն դրական դինամիկան»։ ԵՄ-ի կարծիքով՝ այս դինամիկան կենսական նշանակություն ունի երկարատև խաղաղության և կայունության համար։
Հանդիպմանը մասնակցելու հրավերներ են ուղարկվել 48 պետությունների և կառավարությունների ղեկավարների։ Սպասվում է, որ հավաքին կմասնակցեն ԵՄ բոլոր 27 անդամ պետությունները։
Թուրքիայից բացի՝ հանդիպմանը հրավիրվել են նաև Ալբանիան, Անդորրան, Ադրբեջանը, Բոսնիա և Հերցեգովինան, Վրաստանը, Միացյալ Թագավորությունը, Շվեյցարիան, Իսլանդիան, Չեռնոգորիան, Կոսովոն, Հյուսիսային Մակեդոնիան, Լիխտենշտեյնը, Մոլդովան, Մոնակոն, Նորվեգիան, Սան Մարինոն, Սերբիան և Ուկրաինան։
BBC-ն գրում է, որ այս հանդիպման ամենանշանակալի կողմն առաջին անգամ եվրոպական մայրցամաքից դուրս գտնվող երկրի առաջնորդին հրավիրելն է։ Մասնակիցների թվում կլինի Կանադայի վարչապետ Մարկ Քարնին, որը վերջերս ուշադրություն է գրավել ԱՄՆ-ի հետ հարաբերությունների և միջազգային կարգի վերաբերյալ իր հայտարարություններով։
«Եվրոպան և Կանադան պարզապես համախոհ գործընկերներ չեն. միասին մենք կառուցում ենք համաշխարհային դաշինք՝ խաղաղությունը, համատեղ բարգավաճումը և բազմակողմանիությունը պաշտպանելու համար»,- նշել է Կոշտան՝ մեկնաբանելու Քարնիին հրավիրելու հանգամանքը։
Ռուսաստանը և Բելառուսը բացառված են՝ ակնհայտ հանգամանքների պատճառով։
BBC-ն հիշեցնում է, որ Եվրոպական քաղաքական համայնքը ստեղծվել է 2022 թվականին՝ Ֆրանսիայի նախագահ Էմանուել Մակրոնի նախաձեռնությամբ։ Այն ոչ ֆորմալ հարթակ է, որը թույլ է տալիս լայն աշխարհագրական տարածքի առաջնորդներին փոխանակել տեսակետներ տարբեր հարցերի շուրջ՝ նպաստելով շփումների շղթային։
Հանդիպումները տեղի են ունենում տարին երկու անգամ։ Հանդիպման համար, որը կազմակերպվում է ռոտացիոն համակարգով, մեկ անգամ ընտրվում է ԵՄ անդամ երկիր, իսկ մեկ անգամ՝ ոչ անդամ երկիր։
Երևանից հետո հաջորդ հանդիպումը տեղի կունենա Իռլանդիայում 2026 թվականի նոյեմբերին։
Թարգմանությունը՝ Էմմա Չոբանյանի
