Կանադայի վարչապետը կմասնակցի Երևանում Եվրոպական քաղաքական համայնքի գագաթնաժողովին. հայտնի է՝ որ երկրներն են հրավիրված

Երևանում մայիսի 4-ին նախանշված Եվրոպական քաղաքական համայնքի 8-րդ հանդիպմանը մասնակցելու հրավեր է ստացել 48 պետության և կառավարության ղեկավար։ Կանադայի վարչապետ Մարկ Քարնին որպես հյուր կմասնակցի Եվրոպական քաղաքական համայնքի գագաթնաժողովին։ Սա առաջին դեպքը կլինի, երբ ոչ եվրոպական երկիրը կմասնակցի հանդիպմանը։ Այս մասին հայտնում է ԵՄ խորհուրդը։

Հաղորդվում է հրավիրված ԵՄ անդամ 27 երկրների մասին, հրավիրվել են նաև Վրաստանը, Թուրքիան, Ադրբեջանը, Ուկրաինան, Մոլդովան, Մեծ Բրիտանիան, Նորվեգիան, Շվեյցարիան, Կոսովոն, Սերբիան, Ալբանիան, Անդորրան, Բոսնիա և Հերցեգովինան, Իսլանդիան, Լիխտենշտեյնը, Մոնակոն, Չեռնոգորիան, Հյուսիսային Մակեդոնիան, Սան Մարինոն։

Եվրոպական քաղաքական համայնքի 8-րդ հանդիպումը կհավաքի մայրցամաքի տարբեր երկրների առաջնորդներին՝ «Կառուցելով ապագան. միասնություն և կայունություն Եվրոպայում» կարգախոսի ներքո։

Խորը աշխարհաքաղաքական վերափոխումների ժամանակաշրջանում առաջնորդները կքննարկեն, թե ինչպես ավելի սերտորեն համագործակցել և համակարգել գործողությունները՝ ժողովրդավարական դիմակայունությունը ամրապնդելու, կապը խթանելու և տնտեսական ու էներգետիկ անվտանգությունը ամրապնդելու համար, ասվում է հաղորդագրությունում։

Գագաթնաժողովը համանախագահելու են Եվրոպական խորհրդի նախագահ Անտոնիո Կոշտան և ՀՀ վարչապետ Նիկոլ Փաշինյանը։

Հանդիպումը տեղի կունենա ԵՄ-ՀՀ առաջին երկկողմ գագաթնաժողովից առաջ։

Թարգմանությունը՝ Էմմա Չոբանյանի