02.07.2026 | 11:54
«ՀայաՔվե»-ի և «Մայր Հայաստան»-ի բողոքի ակցիան՝ ՈՒՂԻՂ
Իսրայելը ձերբակալել է Գազայի օգնության նավատորմի 18 թուրք ակտիվիստների
Քաղաքականություն
30.04.2026 | 16:34
The Global Sumud Flotilla-ն հաստատում է, որ իսրայելական ուժերի կողմից Կրետեի ափերի մոտ միջազգային ջրերում 21 նավերի կալանումից հետո ձերբակալվածների թվում 18 թուրք ակտիվիստներ կան, գրում է Turkiye today-ը։
Չորեքշաբթի երեկոյան իսրայելական ուժերը շրջապատել են նավակները հունական Կրետե կղզու ափերի մոտ՝ ձերբակալելով նավերի վրա գտնվող ավելի քան 170 ակտիվիստների։ Ձերբակալված Թուրքիայի քաղաքացիներն են՝ Մուսթաֆա Էնես Թոփալ, Մուհամմեդ Օզդեմ, Ալի Դենիզ, Յունուս Կավա, Շահին Յաշլիկ, Մուստաֆա Արսլան, Աբդուլսելամ Դեմիր, Նևզաթ Օյլեք, Նևզաթ Գյուզել, Հալիլ Էրդողմուս, Աբդուլլաթիֆ Ֆասլի, Հուսեյն Սուայբ Օրդու, Մահմուտ Աքայ, Գորքեմ Դուրու, Մեհմեթ Աթլի,Մուքրեմին Քոսե, Ռամազան Թեքդեմիր և Մահմութ Չագաթայ Յավուզ։
Իսրայելի արտաքին գործերի նախարարությունը հայտնել է, որ մոտ 175 ակտիվիստներ ավելի քան 20 նավակներով «ուղևորվում են դեպի Իսրայել», մինչդեռ 17 նավերի հաջողվել է փախչել և մտնել Հունաստանի տարածքային ջրեր։
Նավատորմը հայտարարել է, որ իսրայելական ուժերը միջազգային ջրերում բռնագրավել են իրենց 58 նավակներից 21-ը։
Նշվում է նաև, որ միջազգային ջրերում իրենց նավերին մոտեցել են իսրայելական ռազմական մոտորանավակներ։ Հաղորդակցությունը խափանվել է, հնչել է SOS ազդանշան։ Իսրայելական ուժերի նահանջից առաջ մի քանի նավերի շարժիչները կոտրել են, նավիգացիոն համակարգերը՝ ոչնչացրել, ինչի հետևանքով որոշ նավակներ անզոր են եղել փոթորկի դեմ։
Նավատորմը, որը տեղափոխում էր 39 երկրներից ավելի քան 400 քաղաքացիական անձանց, վերջին շաբաթների ընթացքում մեկնել էր Մարսելից, Բարսելոնայից և Սիրակուզայից։
Թարգմանությունը՝ Էմմա Չոբանյանի
