02.07.2026 | 12:18
«Բարև ձեզ, ինչի՞ եք եկել», «Ո՞վ եք Դուք, որ ասեք՝ ինչի եք եկել»․ բանավեճ ԱԺ-ում․ ՏԵՍԱՆՅՈՒԹ
Թրամփի մասնակցությամբ ընթրիքի ժամանակ կրակոցներ արձակած տղամարդը պատմել է, թե ով էր իր թիրախը․ CBS News
Քաղաքականություն
26.04.2026 | 11:01
Տղամարդը, որը կասկածվում է ԱՄՆ նախագահ Դոնալդ Թրամփի մասնակցությամբ Սպիտակ տան թղթակիցների ընթրիքի անցկացման վայրի մոտ կրակոցներ արձակելու մեջ, ձերբակալությունից հետո իրավապահներին հայտնել է, որ ցանկանում էր կրակել նախագահի վարչակազմի պաշտոնյաների վրա, հաղորդում է CBS News-ը՝ հղում անելով երկու աղբյուրների։
Իրավապահ մարմիններից մեկ այլ աղբյուրի խոսքով՝ կասկածյալը չի հստակեցրել, որ իր թիրախը հենց Թրամփն էր, այլ միայն նշել է «վարչակազմի պաշտոնյաներին»։
Նրա սոցիալական ցանցերից մեկի էջում նշվում է, որ նա աշխատել է որպես ուսուցիչ C2 Education-ում և 2024 թվականի դեկտեմբերին ստացել է «Ամսվա ուսուցիչ» մրցանակը։
Հարձակվողը զինված է եղել որսորդական հրացանով, ատրճանակով և մի քանի դանակներով, երբ փորձել է ճեղքել հյուրանոցի ռեստորանի մոտ գտնվող անվտանգության անցակետը։ Նա մի քանի կրակոց է արձակել՝ թեթև վիրավորելով Գաղտնի ծառայության գործակալին, որը զրահաբաճկոնով է եղել։ Հարձակվողը նույնպես վիրավորվել է։
Ավելի վաղ հայտնել ենք, որ ԱՄՆ նախագահ Դոնալդ Թրամփը և նրա վարչակազմի անդամները տարհանվել են Սպիտակ տան թղթակիցների ասոցիացիայի տարեկան ընթրիքից, որն անցկացվում էր Washington Hilton հյուրանոցում, «անվտանգության սպառնալիքի» պատճառով, հայտնում են տեղական լրատվամիջոցները։ ԶԼՄ-ների տվյալներով՝ խոսքը վերաբերում է մի տղամարդու, ով հյուրանոցում կրակ է բացել։
ԱՄՆ գաղտնի ծառայությունն ու այլ անվտանգության մարմինները շրջապատել են հյուրանոցի հանդիսությունների սրահը, որտեղ ավելի քան հարյուր մարդ սպասում էր Թրամփի ելույթին, գրում է Associated Press գործակալությունը։ Մասնակիցներից ոմանք հայտնել են, որ, իրենց կարծիքով, լսել են հինգից ութ կրակոց։ Կրակողը չի ներխուժել սրահ․ միջադեպը տեղի է ունեցել հյուրանոցի այլ հատվածներից մեկում։
Միջոցառմանը ներկա էին նաև առաջին տիկին Մելանյա Թրամփը, ԱՄՆ փոխնախագահ Ջեյ Դի Վենսը, պաշտպանության նախարար Փիթ Հեգսեթը և պետքարտուղար Մարկո Ռուբիոն։ Նրանք, ինչպես նաև միջոցառմանը հրավիրված լրագրողները, տարհանվել են, իսկ հյուրանոցում անվտանգության միջոցները խստացվել են։
