Սամարայի վրա ուկրաինական հարձակման հետևանքով զոհ և վիրավորներ կան

Սամարայի մարզի Նովոկույբիշևսկ քաղաքում մեկ մարդ զոհվել է, մի քանիսը՝ վիրավորվել արդյունաբերական ձեռնարկության վրա ուկրաինական անօդաչու թռչող սարքի հարձակման հետևանքով, հայտնել է մարզի նահանգապետ Վյաչեսլավ Ֆեդորիշչևը, գրում է Current time-ը։

Նա չի նշել, թե որ օբյեկտն է հարձակման ենթարկվել։ Նախկինում ուկրաինական անօդաչու թռչող սարքերը մի քանի անգամ հարձակվել էին Նովոկույբիշևսկի նավթավերամշակման գործարանի վրա։

Պայթյուններ են գրանցվել նաև Նիժնի Նովգորոդի մոտ գտնվող Կստովո շրջանում, որտեղ նավթավերամշակման գործարան կա․ այն նույնպես նախկինում բազմիցս ենթարկվել է ուկրաինական անօդաչու թռչող սարքերի հարձակմանը:

Սևաստոպոլի ղեկավար Միխայիլ Ռազվոժաևը հայտնել է, որ անօդաչուները հարձակվել են նաև բռնակցված Ղրիմի վրա։

«Крымский ветер» և «Exilenova+» Telegram ալիքները հայտնել են Թեոդոսիայի նավթաբազային հարվածների մասին։

Ռուսաստանի հարավում գտնվող Տուապսե քաղաքում անօդաչուների հարձակումներից հետո «Ռոսնեֆտի» նավթավերամշակման գործարանը և ծովային տերմինալը շարունակում են այրվել: Արբանյակային լուսանկարներում երևում է, որ հրդեհից առաջացած ծուխը տարածվում է ավելի քան 300 կիլոմետր: Տեղի բնակիչները հայտնել են, որ նավթի կաթիլների անձրև է տեղում քաղաքի վրա:

Մեկ օր առաջ Սիզրանում ուկրաինական անօդաչու թռչող սարքի հարվածից փլուզվել էր բազմահարկ բնակելի շենքի մի հատված։ Փլատակների տակ հայտնաբերվել են երկու մարմիններ։ Հարձակման հետևանքով վիրավորվել է ևս 12 մարդ։ Վնասված շենքը գտնվում է Սիզրանի նավթավերամշակման գործարանից մոտավորապես երեք կիլոմետր հեռավորության վրա:

Թարգմանությունը՝ Էմմա Չոբանյանի