Իրանն Իսրայելին մեղադրել է Թեհրանի և Բաքվի միջև թշնամանք հրահրելու փորձի մեջ

Բաքվում Իրանի դեսպանությունը կտրականապես հերքել է Իսրայելի անվտանգության և ռազմական կառույցների վերջին պնդումները, որ «Իրանի հետ կապված որոշ անձինք կամ հաստատություններ ծրագրում են գործողություններ ձեռնարկել ռեժիմի շահերի դեմ որոշ երկրներում, այդ թվում՝ Ադրբեջանի  տարածքում», և գնահատում է, որ «նման մթնոլորտի ստեղծման նպատակն է Իրանի և հարևան երկրների, մասնավորապես՝ Ադրբեջանի միջև պառակտում և թշնամանք հրահրելը»։

Դեսպանատան հայտարարության մեջ նշվում է, որ «Իսրայելի ահաբեկչական ռեժիմը դեռևս փորձում է դավադրություններ կազմակերպել և անհամաձայնություն ստեղծել հարևանների միջև՝ ուրիշների հաշվին իր չար նպատակներին հասնելու համար»։

«Սիոնիստական ​​ռեժիմի վարքագծի պատմության վերանայումը, այդ թվում՝ 2025 թվականի հունիսին Իրանի դեմ 12-օրյա ռազմական ագրեսիայի, ինչպես նաև 2026-ի փետրվարի 28-ին սկսված վերջին ագրեսիայի ընթացքում, ցույց է տալիս, որ այս ռեժիմն անընդհատ ձգտում է ընդլայնել հակամարտության շրջանակը և պատերազմը տարածել Իրանի շրջակայքում, և այս առումով օրակարգ է բերել կեղծ տեղեկատվությունը և խաբուսիկ գործողությունները, որոնք հայտնի են որպես «կեղծ դրոշի գործողություններ»»,- ասվում է դեսպանատան հայտարարությունում։

Նշվում է, որ հասանելի ապացույցները, այդ թվում՝ Նախիջևանի Ինքնավար Հանրապետության վրա անօդաչու թռչող սարքերի ենթադրյալ հարձակումները, Կասպից ծովի նավահանգստային և նավագնացության ենթակառուցվածքների վրա հարձակումները, ինչպես նաև տարածաշրջանում օդային և ծովային ուղիներն ու տնտեսական գործունեությունն անկայունացնելու փորձերը վկայում են Իսրայելի ռեժիմի կողմից նման օրակարգի մասին։

Հաշվի առնելով վերը նշվածը՝ «ընդգծվում է Իսրայելի ահաբեկչական ռեժիմի դավադրություններին և կործանարար գործողություններին հակազդելու անհրաժեշտությունը Իրանի և Ադրբեջանի միջև բարեկամական ու եղբայրական հարաբերություններում»։

Հիշեցնենք, որ իսրայելական Մոսադի, բանակի և Անվտանգության ու հակահետախուզական ծառայության (Շին Բեթ) համատեղ հայտարարության մեջ նշվել էր, որ Ադրբեջանը Բաքու-Թբիլիսի-Ջեյհան խողովակաշարի վրա իրանական հարձակում է կանխել։

Թարգմանությունը՝ Էմմա Չոբանյանի