Վերջին ամիսներին Իսրայելը բացահայտել է իրանական ահաբեկչական ցանց, որը թիրախավորել էր իսրայելցի պաշտոնյաներին և ակտիվներն ամբողջ աշխարհում։ Այս մասին ասվում է իսրայելական Մոսադի, բանակի և Անվտանգության ու հակահետախուզական ծառայության (Շին Բեթ) համատեղ հայտարարության մեջ, գրում է The Times of Israel-ը։
Նշվում է, որ ցանցի ավագ գործակալները սպանվել են փետրվարի 28-ին Իրանի դեմ սկսված արշավի ընթացքում։
Ադրբեջանը մարտին հայտարարել էր, որ իր տարածքում կանխել է իրանական մի շարք ահաբեկչական հարձակումներ, այդ թվում՝ Բաքվում Իսրայելի դեսպանատան, սինագոգի և հրեական համայնքի առաջնորդների դեմ։ Ադրբեջանի պետական անվտանգության ծառայությունը հայտարարել էր, որ «կանխվել են ահաբեկչական և հետախուզական գործողություններ, որոնք կազմակերպվել էին Իրանի Իսլամական հեղափոխության պահապանների կորպուսի (ԻՀՊԿ) կողմից»։
Նախատեսված թիրախների թվում էր նաև Բաքու-Թբիլիսի-Ջեյհան խողովակաշարը, որն անցնում է հարևան Վրաստանի և Թուրքիայի միջով և տեղափոխում Իսրայելի նավթի ներմուծման շուրջ մեկ երրորդը, ասվում է ծառայության հաղորդագրության մեջ։
Իսրայելական կողմի հայտարարության համաձայն՝ նրանք մաքսանենգ ճանապարհով Ադրբեջան էին տեղափոխել պայթուցիկ անօդաչու թռչող սարքեր և հետախուզական տվյալներ էին հավաքում պոտենցիալ թիրախների վերաբերյալ՝ իրենց իրանցի հրահանգիչների անմիջական հրահանգներով։
Նշվում է, որ ցանցի համար պատասխանատու էր Ռահման Մողադամը՝ Իսլամական հեղափոխության պահապանների կորպուսի հետախուզության հատուկ գործողությունների բաժնի (4000-րդ դիվիզիա) ղեկավարը, որը սպանվել է։ Մողադամը հավաքագրել և մարզել է Իրանի ներսում և դրսում գործող անձանց և խնդրել նրանց հետախուզական տվյալներ հավաքել Իսրայելի քաղաքական առաջնորդների, անվտանգության պաշտոնյաների, Իսրայելի և արևմտյան ռազմական կառույցների, նավահանգիստների և ամբողջ աշխարհում Իսրայելի նավերի վերաբերյալ։
Ըստ իսրայելական կողմի հայտարարության՝ նա ծառայել է ԻՀՊԿ-ի հետախուզության ավագ սպա Մաջիդ Խադեմիի ղեկավարության ներքո, որը նույնպես սպանվել է Իսրայելի կողմից պատերազմի ժամանակ։
Մողադամի ցանցի կենտրոնական դերակատարներից մեկը Մոհսեն Սուրին էր, որը նույնպես 4000-րդ դիվիզիայի անդամ էր։ Նա հանդիպել է Իրանից դուրս գտնվող ահաբեկչական բջիջների հետ և սպանվել Իսրայելի կողմից ԻՀՊԿ-ի անվտանգության կետի վրա հասցված հարվածի ժամանակ։
Հաղորդվում է, որ Մահդի Յեքեհ-Դեղանը, որը հայտնի է որպես «Բժիշկ», ղեկավարում էր ցանցը Ադրբեջանում և դրանից դուրս: Նրա դերը բացահայտվել է հունվարին, երբ թուրքական իշխանությունները Իրանի օգտին քաղաքական և ռազմական լրտեսության մեղադրանքով ձերբակալել էին վեց մարդու, այդ թվում՝ մեկ իրանցու, հինգ նահանգներում համակարգված ռեյդերից հետո: Յեքեհ-Դեղանը ղեկավարում էր բջիջը՝ աշխատելով Իրանից Թուրքիայի միջոցով Կիպրոս պայթուցիկ անօդաչու թռչող սարքերի մաքսանենգության և Ինջիրլիքի բազայում գտնվող ամերիկյան ուժերի վերաբերյալ հետախուզական տվյալներ հավաքելու վրա:
Իրանի դեմ ԱՄՆ-Իսրայել պատերազմից հետո Իսլամական հեղափոխության պահապանների կորպուսը կրկնապատկել է իր ջանքերը՝ արտերկրում ահաբեկչական բջիջներ ստեղծելու և հարձակումներ իրականացնելու համար, ասվում է Իսրայելի հայտարարության մեջ։
Թարգմանությունը՝ Էմմա Չոբանյանի
