07.08.2026 | 13:29
Հայ ուշուիստները մեդալներ են նվաճել միջազգային մրցաշարում
Ընտրություններին ընդառաջ Կառավարությունը 3000 դրամով կսուբսիդավորի պարարտանյութերի գները․ բյուջեից 900 մլն դրամ կհատկացվի․ ՏԵՍԱՆՅՈՒԹ
Տնտեսություն
18.04.2026 | 09:49
Խորհրդարանական ընտրություններից երկու ամիս առաջ Կառավարությունը նախատեսում է սուբսիդավորել գյուղացիների կողմից ձեռք բերվող պարարտանյութերի արժեքը։
Էկոնոմիկայի նախարարության հեղինակած նախագծի հիմնավորման մեջ նշվում է, որ վերջին շրջանում ազոտական պարարտանյութի գինը զգալի աճել է՝ որոշ դեպքերում հասնելով մինչև շուրջ 3000 դրամով ավելի բարձր մակարդակի, ինչը հիմնականում կապված է միջազգային շուկաներում և ներմուծման խնդիրներով պայմանավորված զարգացումներով։
Պարարտանյութի հիմնական մատակարար երկրներն են Ռուսաստանը, Իրանը և Վրաստանը։
Կառավարության գնահատմամբ՝ ներկայիս իրավիճակը կարող է բացասաբար ազդել գյուղատնտեսության վրա՝ բերքատվության նվազման և հողերի բերրիության անկման տեսանկյունից, եթե պարարտանյութերի օգտագործումը կրճատվի։ Ծրագրի շրջանակում նախատեսվում է, որ մեկ շահառու կարող է օգտվել աջակցությունից առավելագույնը 30 հեկտար հողատարածքի համար։ Պետությունը կսուբսիդավորի 50 կգ քաշով մեկ պարկ պարարտանյութի արժեքը՝ շուկայական գնից մինչև 3000 դրամի չափով, իսկ վաճառքի հիմք կդառնա 8000 դրամ շեմը։
Պարարտանյութերը կվաճառվեն միայն նախարարության հաստատած մատակարարների միջոցով, իսկ դրանց որակի համար պատասխանատվություն կկրի մատակարարը։ Բաշխման և հաշվառման գործընթացը կիրականացվի համայնքային իշխանությունների միջոցով՝ համապատասխան ակտերով։
Ծրագրի իրականացման համար 2026 թվականի պետական բյուջեից նախատեսվում է շուրջ 900 միլիոն դրամ ծախս։ Կառավարության գնահատմամբ՝ նախաձեռնությունը պետք է նպաստի գյուղատնտեսության արտադրողականության բարձրացմանը և հողերի արդյունավետ օգտագործմանը։
Նարեկ Կիրակոսյան
