Պուտինի վարկանիշն արդեն վեց շաբաթ անընդմեջ անկում է գրանցում

Վեցերորդ շաբաթն անընդմեջ ռուսական պետական​ ВЦИОМ սոցիոլոգիական ծառայությունը Ռուսաստանի նախագահ Վլադիմիր Պուտինի վարկանիշի անկում է գրանցել։ Այն հասել է Ուկրաինա լիամասշտաբ ներխուժումից ի վեր ամենացածր մակարդակին և շարունակում է անկում ապրել, գրում է Current time-ը։

Ապրիլի 6-ից 12-ն անցկացված հարցման համաձայն՝ Պուտինի հավանության վարկանիշը կազմել է 66,7%, ինչը 1,1 տոկոսային կետով պակաս է նախորդ շաբաթվա համեմատ։ Պուտինի վստահության վարկանիշը նույնպես նվազել է՝ հասնելով 72%-ի: Այսպիսով, ՌԴ նախագահի վարկանիշն ամենացածրն է 2022 թվականի փետրվարից ի վեր: Պատերազմից առաջ անցկացված վերջին հարցման ժամանակ այն ավելի ցածր էր (64,3%):

«Եդինայա Ռոսիա» կուսակցության վարկանիշը նույնպես նվազում է, միաժամանակ, ВЦИОМ-ը գրանցել է Դումայում ներկայացված մյուս կուսակցությունների վարկանիշի աճ։

Պետական մեկ այլ սոցիոլոգիական ինստիտուտ՝ «Հանրային կարծիքի հիմնադրամը», նույնպես գրանցել է Պուտինի վարկանիշի անկում, սակայն, կազմակերպության հարցումների համաձայն, այն հետագայում կրկին բարձրացել է։

Սոցիոլոգիական ծառայությունները չեն հայտնել Պուտինի վարկանիշի անկման կոնկրետ պատճառները։ Վերջին շաբաթներին ինտերնետի արգելափակումը դժգոհություն է առաջացրել, այդ թվում՝ պատերազմամետ շրջանակներում։ Բլոգեր Վիկտորիա Բոնյայի տեսաուղերձը Պուտինին մեծ իրարանցում է առաջացրել։ Բոնյան խոսել էր ժողովրդի և Պուտինի միջև «հսկայական պատի» և այն մասին, թե ինչպես են բոլորը, նույնիսկ «նահանգապետերը», վախենում նրանից։

Թարգմանությունը՝ Էմմա Չոբանյանի