02.07.2026 | 06:06
ԱԱ-2026. ԱՄՆ-ի հավաքականը շարժվում է առաջ. ՏԵՍԱՆՅՈՒԹ
Պուտինի վարկանիշը ՌԴ-ում ամենացածրն է 2022 թվականի փետրվարից ի վեր
Քաղաքականություն
10.04.2026 | 19:27
Ապրիլի 10-ին հրապարակված վերջին հարցման մեջ ռուսական պետական «Համառուսական հասարակական կարծիքի ուսումնասիրության կենտրոնը» (ВЦИОМ) հայտնել է Ռուսաստանի նախագահ Վլադիմիր Պուտինի վարկանիշի նոր անկման մասին, գրում է Current time-ը։
Կենտրոնի տվյալներով՝ Պուտինի հավանության վարկանիշը մարտի 30-ից ապրիլի 5-ը կազմել է 67,8%, ինչը 2,3 տոկոսային կետով ցածր է մարտի 19-ից 22-ն անցկացված նախորդ հարցման համեմատ։ Այսպիսով, ըստ ВЦИОМ-ի, Պուտինի վարկանիշն ամենացածրն է 2022 թվականին Ուկրաինա լայնածավալ ներխուժումից ի վեր։ Այն ավելի ցածր էր պատերազմից առաջ անցկացված վերջին հարցման ժամանակ (64,3%), իսկ փետրվարի 24-ից մինչև այսօր չէր իջել 70%-ից։
Մեկ այլ հարցի՝ «Դուք վստահո՞ւմ եք Պուտինին», հարցվածների 73,8%-ը դրական է պատասխանել, ինչը նույնպես ցածր է նախորդ շաբաթվա արդյունքի համեմատ։
«Հանրային կարծիքի հիմնադրամի» կողմից այսօր հրապարակված մեկ այլ հարցում գրանցել է Պուտինի վարկանիշի մեկ միավորով աճ՝ 74%-ից մինչև 75%: Սա նույնպես ցածր է վերջին տարիների միջին ցուցանիշից: Միևնույն ժամանակ, «Եդինայա Ռոսիա»-ի վարկանիշը շաբաթվա ընթացքում նվազել է։
Սոցիոլոգիական ծառայությունները չեն հաղորդում Պուտինի վարկանիշի անկման կոնկրետ պատճառները։
Վերջին շաբաթներին ինտերնետի արգելափակումը դժգոհություն է առաջացրել, այդ թվում՝ պատերազմամետ շրջանակների շրջանում։ Կրեմլին մոտ կանգնած անանուն քաղտեխնոլոգը, որին մեջբերել է Meduza-ն, պնդում է, որ կան նաև այլ գործոններ։
«Տեղի են ունենում չափազանց շատ [բացասական] բաներ՝ սկսած անընդհատ բարձրացող գներից մինչև պատերազմից հոգնածության աճը։ Դժվար է գնահատել արգելափակումների ներդրումը»,- ասել է աղբյուրը։
Թարգմանությունը՝ Էմմա Չոբանյանի
