16.04.2026 | 23:27
Ինչ իրավիճակ է Հայաստանի ճանապարհներին և Լարսում
Հռոմի պապը քննադատել է «բռնակալներին», որոնք միլիարդներ են ծախսում պատերազմների վրա
Քաղաքականություն
16.04.2026 | 20:50
Հռոմի պապ Լևոն 14-րդը Կամերունում կտրուկ արտահայտություններով քննադատել է պատերազմների վրա միլիարդներ ծախսող առաջնորդներին՝ ասելով, որ աշխարհն «ավերվում է մի քանի բռնակալների կողմից»։ Սա տեղի է ունեցել այն բանից հետո, երբ ԱՄՆ նախագահ Դոնալդ Թրամփը սոցցանցերում կրկին «հարձակվել» է կաթոլիկ քահանայապետի վրա, գրում է BBC-ն։
Կամերունի՝ հակամարտություններից տուժած Բամենդա անգլիախոս տարածաշրջանում ելույթ ունենալով՝ ԱՄՆ-ից առաջին Հռոմի պապը նաև դատապարտել է նրանց, որոնք «մանիպուլյացիաներ են անում կրոնով և Աստծո անունով՝ իրենց սեփական ռազմական, տնտեսական և քաղաքական շահույթի համար», զգուշացնելով՝ հավատքը չօգտագործել բռնությունն արդարացնելու համար։
Դիմելով գրեթե մեկ տասնամյակ տևած անկարգություններից տուժած համայնքի ներկայացուցիչներին՝ նա ասել է, որ եկել է «խաղաղություն հռչակելու», բայց պարզել է, որ տեղացիներն արդեն «խաղաղություն են հռչակում ինձ և ամբողջ աշխարհին»։
Լևոն պապն ընդգծել է պատերազմի մարդկային արժեքը՝ քննադատելով առաջնահերթությունների գլոբալ անհավասարակշռությունը։
«Զորավարները ձևացնում են, թե չեն հասկանում, որ ոչնչացման համար ընդամենը մեկ ակնթարթ է պահանջվում, բայց հաճախ ամբողջ կյանքը բավարար չէ վերականգնման համար»,- ասում է նա՝ հավելելով, որ «միլիարդավոր դոլարներ են ծախսվում սպանությունների և ոչնչացման վրա, բայց բուժման, կրթության և վերականգնման համար անհրաժեշտ ռեսուրսները ոչ մի տեղ չեն գտնվում»։
Կոչ անելով «վճռական ուղու փոփոխության»՝ Պապը հորդորել է անցնել «մարդկային եղբայրությամբ հարուստ կայուն ուղու»։ Մռայլ պատկերից անկախ՝ նա ընդգծել է, որ չնայած «աշխարհն ավերվում է մի բուռ բռնակալների կողմից», այն նաև «միասին է պահում աջակից եղբայրների և քույրերի բազմությունը»։
Թարգմանությունը՝ Էմմա Չոբանյանի
