10.10.2026 | 12:57
Նավթի գներն աճել են
Իսրայելը հարվածել է Լիբանանին. «Հըզբոլլահ»-ն իր հերթին հրթիռակոծել է Իսրայելի հյուսիսը
Քաղաքականություն
15.04.2026 | 16:52
Իսրայելը և «Հըզբոլլահ»-ը չորեքշաբթի հարվածներ են փոխանակել՝ Վաշինգտոնում կայացած իսրայելա-լիբանանյան բանակցություններից մեկ օր անց։ Լիբանանի ազգային լրատվական գործակալությունը հաղորդել է հարավային Լիբանանում իսրայելական օդային հարվածների և անօդաչու թռչող սարքերի հարձակումների հետևանքով զոհերի մասին։ Իսրայելը, իր հերթին, հայտարարել է, որ հարավային Լիբանանում դեռևս շարունակվում են «նպատակային ցամաքային գործողությունները»։
Միաժամանակ, Իսրայելի զինվորականները AFP լրատվական գործակալությանը հայտնել են, որ վաղ առավոտյան հայտնաբերել են «մոտավորապես 30 հրթիռային արձակում» Իսրայելի ուղղությամբ։
«Հըզբոլլահ»-ը ստանձնել է Իսրայելի հյուսիսային մասի վրա հարձակումների պատասխանատվությունը։ Իսրայելի շտապօգնության ծառայությունը հայտնել է մեկ տղամարդու վիրավորվելու մասին։
Բացի այդ, Իսրայելի բանակը նոր տարհանման հրաման է տվել Հարավային Լիբանանի բնակիչներին, քանի որ շարունակում է հարձակումը «Հըզբոլլահ» շարժման զինյալների դեմ։
«Ավիահարվածները շարունակվում են, քանի որ Իսրայելի ուժերը գործում են զգալի ուժերով այդ տարածքում։ Հետևաբար, մենք կրկնում ենք մեր հրատապ կոչը՝ անհապաղ լքել ձեր տները և շարժվել Զահրանի գետից հյուսիս»,- ասվում է հայտարարության մեջ։
Սա իսրայելցի զինվորականների կողմից տարհանման առաջին հրամանն է Վաշինգտոնում Լիբանանի և Իսրայելի դեսպանների միջև ուղիղ բանակցություններից ի վեր։
Մի շարք լիբանանցի առաջնորդներ քննադատել են «Հըզբոլլահ»-ին Իրանի հետ վերջին հակամարտության ֆոնին Իսրայելի վրա հարձակվելու համար և պնդում են նրա զինաթափման հարցում։
ԱՄՆ-ում Լիբանանի դեսպան Նադա Համադե Մոավեդը կոչ է արել դադարեցնել կրակը և ընդգծել է Լիբանանի տարածքային ամբողջականությունը հարգելու անհրաժեշտությունը։
ՄԱԿ-ի մարդու իրավունքների գերագույն հանձնակատար Վոլկեր Թյուրկը քննադատել է Իսրայելի կողմից Լիբանանի վրա իրականացված հարվածները՝ ասելով, որ «Լիբանանում այսօր տեղի ունեցած սպանությունների և ավերածությունների մասշտաբները պարզապես սարսափելի են»։
Թարգմանությունը՝ Էմմա Չոբանյանի
