02.07.2026 | 12:50
Չեմ վերցնի մանդատը, ուզում եմ հանգստանալ. Ալեն Սիմոնյան․ ՏԵՍԱՆՅՈՒԹ
Լավրովն Իրանի հարստացված ուրանի խնդրի լուծումներ է առաջարկել
Քաղաքականություն
15.04.2026 | 13:31
Ռուսաստանը պատրաստ է օգնել Իրանի հարստացված ուրանի հարցի լուծմանը։ Այս մասին հայտարարել է ՌԴ արտաքին գործերի նախարար Սերգեյ Լավրովը։ Նրա խոսքով՝ Մոսկվան պատրաստ է այս ուղղությամբ Թեհրանի համար առավել ընդունելի գործողություններ ձեռնարկել։
Ռուսաստանցի պաշտոնյան ներկայացրել է խնդրի լուծման տարբերակներ, այդ թվում՝ որոշակի քանակությամբ ուրանի տեղափոխումը Ռուսաստանում պահեստավորման կամ դրա վերամշակումը՝ որպես վառելիք օգտագործելու համար պիտանի ուրանի։
«Ռուսաստանը պատրաստ է իր դերը խաղալ հարստացված ուրանի հարցի լուծման գործում։ Այս դերը կարող է տարբեր ձևեր ունենալ, այդ թվում՝ բարձր հարստացված ուրանի վերածումը վառելիքային որակի ուրանի և որոշակի քանակի փոխանցումը Ռուսաստանին պահեստավորման համար»,- ասել է Լավրովը՝ հավելելով, որ այս ուղղությամբ որևէ գործողություն չպետք է խախտի Իրանի իրավունքը՝ հարստացնելու ուրանը խաղաղ նպատակներով։
Իրանի բարձր հարստացված ուրանի պաշարները, որոնք համարվում են միջուկային զենք ստեղծելու հնարավորության նախադրյալ, հիմնական վիճելի կետերից են ԱՄՆ-ի և Իրանի միջև պատերազմը դադարեցնելու բանակցություններում։ Սպիտակ տան պաշտոնյան CNN-ին հայտնել էր, թե ԱՄՆ-ը պահանջել է, որ Իրանը դադարեցնի հարստացման ծրագիրը և պնդել շուրջ 460 կիլոգրամ բարձր հարստացված ուրանի փոխանցման հարցում, որը, ենթադրաբար, թաղված է գետնի տակ։
Ավելի վաղ Պենտագոնի ղեկավար Փիթ Հեգսեթը հայտարարել էր, որ Իրանը կա՛մ կամավոր կհանձնի իր հարստացված ուրանը ԱՄՆ-ին, կա՛մ Վաշինգտոնը ստիպված կլինի ուժով գրավել նյութերը։
ԱՄՆ նախագահ Դոնալդ Թրամփը նույնպես հայտարարել է, որ Վաշինգտոնը, Իրանի հետ համատեղ, միջուկային վառելիքը կարդյունահանի ստորգետնյա մասից և դուրս կբերի այն Իսլամական Հանրապետությունից։
Հիշեցնենք, որ դեռևս նախորդ ամիս ՌԴ նախագահ Վլադիմիր Պուտինը ԱՄՆ-ին առաջարկել էր հարստացված ուրանի պաշարները Իրանից Ռուսաստան տեղափոխել՝ Մերձավոր Արևելքի պատերազմը դադարեցնելու համաձայնագրի շրջանակներում
Թարգմանությունը՝ Էմմա Չոբանյանի
