ԱՄՆ-ը պնդում է, որ Իրանի նավահանգիստների շրջափակումը լիովին դադարեցրել է առևտուրը

ԱՄՆ զինված ուժերը հայտարարել են, որ իրանական նավահանգիստների շրջափակումը «լիովին իրականացվել է», իսկ Իրանից ծովով առևտուրը՝ «լիովին դադարեցվել», գրում է Al Jazeera-ն։

ԱՄՆ Կենտրոնական հրամանատարությունը (CENTCOM), որը պատասխանատու է Մերձավոր Արևելքում ռազմական գործողությունների համար և ղեկավարում է Իրանի դեմ պատերազմը, սոցցանցերում գրառմամբ նշել է, որ շրջափակումը կիրառվում է բոլոր երկրների նավերի նկատմամբ, որոնք «մտնում կամ դուրս են գալիս Իրանի ափամերձ տարածքներ կամ նավահանգիստներ»։

«Իրանի տնտեսության մոտավորապես 90%-ը սնվում է ծովային միջազգային առևտրով։ Շրջափակման կիրառումից հետո 36 ժամից էլ պակաս ժամանակահատվածում ԱՄՆ ուժերն ամբողջությամբ դադարեցրել են Իրանից ծովային առևտուրը»,- նշել է CENTCOM-ի հրամանատար, ծովակալ Բրեդ Քուփերը։

CENTCOM-ը հայտարարել է, որ գործողությանը մասնակցում են ավելի քան 10,000 նավաստիներ, ծովային հետևակի զինծառայողներ և ԱՄՆ ռազմաօդային ուժերի անձնակազմ, և որ առաջին 24 ժամվա ընթացքում վեց առևտրային նավեր կատարել են շրջադարձ կատարելու և «իրանական նավահանգիստ վերադառնալու»՝ ԱՄՆ հրամանը։

Reuters-ը հայտնել է, որ ԱՄՆ ռազմածովային ուժերի ականակիրը երեքշաբթի, շրջափակման ուժի մեջ մտնելուց մեկ օր անց, կանգնեցրել է երկու նավթատար լցանավերի՝ Իրանից դուրս գալու փորձը և հրահանգել վերադառնալ նավահանգիստ։

Նավերն Իրանի Չաբահար նավահանգիստը լքել են Օմանի ծոցում, ԱՄՆ ռազմանավը կապվել է նրանց հետ ռադիոկապի միջոցով, Reuters-ին հայտնել է մի պաշտոնյա՝ անանունության պայմանով։

ԱՄՆ նախագահ Դոնալդ Թրամփը հույս ունի, որ շրջափակումը կստիպի Իրանի պաշտոնյաներին ընդունել Վաշինգտոնի պայմանները՝ Իրանի դեմ ԱՄՆ-ի և Իսրայելի պատերազմը դադարեցնելու համար։ Նա շրջափակման մասին հայտարարեց այն բանից հետո, երբ շաբաթավերջին Պակիստանում ԱՄՆ-ի և Իրանի միջև բանակցությունները խափանվեցին, որոնք հաջորդեցին հրադադարի մասին հայտարարությանը։

CENTCOM-ը հայտարարել է, որ ոչ մի նավ չի անցել ԱՄՆ շրջափակումից այն բանից հետո, երբ այն ուժի մեջ է մտել երկուշաբթի՝ ժամը 10:00-ին (Երևանով 18:00):

Թարգմանությունը՝ Էմմա Չոբանյանի