Կրեմլը չի շնորհավորի Հունգարիայի ընդդիմության առաջնորդին ընտրություններում հաղթանակի կապակցությամբ

Ռուսաստանը չի շնորհավորի հունգարական «Տիսա» կուսակցության առաջնորդ Պետեր Մագյարին խորհրդարանական ընտրություններում տարած հաղթանակի կապակցությամբ։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է Meduza-ն։

«Մենք շնորհավորանքներ չենք հղում ոչ բարյացակամ երկրներին։ Իսկ Հունգարիան ոչ բարյացակամ երկիր է. այն աջակցում է մեր դեմ պատժամիջոցներին»,- ասել է Պեսկովը։

Հարցին՝ արդյո՞ք դա նշանակում է, որ Մոսկվան բացառապես բարեկամ է Հունգարիայի վարչապետ Վիկտոր Օրբանի հետ, Պեսկովը պատասխանել է. «Մենք երկխոսություն էինք վարում նրա հետ»։

Հունգարիան, ինչպես ԵՄ մյուս երկրները, 2022 թվականի մարտի 5-ի կառավարության որոշմամբ, ընդգրկվել է Ռուսաստանի «անբարյացակամ պետությունների» ցանկում: 2022 թվականի ապրիլին Պուտինը, ըստ Կրեմլի մամուլի ծառայության, Վիկտոր Օրբանին ուղարկել է «շնորհավորական հեռագիր Հունգարիայի Ազգային ժողովի ընտրություններում իր գլխավորած կուսակցական կոալիցիայի հաղթանակի կապակցությամբ»:

Այսօր ավելի վաղ Պեսկովը հայտարարել էր, որ Կրեմլը «հարգում է» հունգարացիների ընտրությունը և ասել, որ «Ռուսաստանի իշխանություններն ակնկալում են շարունակել «շատ պրագմատիկ շփումները Հունգարիայի նոր ղեկավարության հետ»»։

Ապրիլի 12-ին Հունգարիայում կայացած ընտրություններում Վիկտոր Օրբանի իշխող «Ֆիդես» կուսակցությունը պարտվել է Պետեր Մագյարի գլխավորած ընդդիմադիր «Տիսա»-ին։ Օրբանը համարվում էր Պուտինի քիչ թվով դաշնակիցներից մեկը Եվրոպայում։

Թարգմանությունը՝ Էմմա Չոբանյանի