Պակիստանը պատրաստվում է հյուրընկալել ԱՄՆ-Իրան բանակցությունները․ Իսլամաբադում անվտանգության ուժեղացված միջոցառումներ են

Իսլամաբադի դիվանագիտական ​​թաղամասում անվտանգության նկատելիորեն ուժեղացված ներկայություն է, քանի որ Պակիստանը պատրաստվում է հյուրընկալել Միացյալ Նահանգների և Իրանի պատվիրակությունների միջև բարձր մակարդակի բանակցությունները, գրում է DW-ն։

Նշվում է, որ բնակիչների տեղաշարժը նվազագույնի հասցվել, տեղակայվել է ավելի քան 10,000 անվտանգության աշխատակից, այդ թվում՝ ոստիկաններ, զինվորներ և կիսառազմականացված ստորաբաժանումներ։ Խիստ պահպանվող «Կարմիր գոտին», որտեղ գտնվում են կառավարական կարևոր շենքերը և օտարերկրյա դեսպանատները, շրջափակվել է, հինգաստղանի «Սերենա» հյուրանոցի հյուրերը, ըստ տեղեկությունների, տեղափոխվել են այլ սենյակներ՝ պատվիրակների համար տեղ ազատելու նպատակով, չնայած բանակցությունների ճշգրիտ վայրը պաշտոնապես հաստատված չէ։

«Պակիստանը ողջունում է բոլոր պատվիրակներին, այդ թվում՝ մասնակից երկրների լրագրողներին, որոնք ճանապարհորդում են Իսլամաբադ բանակցությունների հետ կապված»,- սոցցանցերում գրել է երկրի արտաքին գործերի նախարար Իշաք Դարը՝ հաստատելով, որ մասնակիցների համար վիզային սահմանափակումները մեղմացվել են։

Պակիստանի ներգաղթային մարմինները հյուրերին վիզաներ կտրամադրեն երկիր ժամանելուն պես։

Գերմանական DPA-ն, հղում անելով Պակիստանի անվտանգության աղբյուրներին, նշում է, որ պատվիրակությունների դիվանագիտական ​​փորձագետների միջև բանակցությունները նախատեսված են ուրբաթ՝ մինչև շաբաթ օրը նախատեսված գլխավոր բանակցողների հանդիպումը։ Անհրաժեշտության դեպքում բանակցությունները կարող են շարունակվել մինչև կիրակի։

Բանակցությունները, ինչպես սպասվում է, կլինեն անուղղակի, երկու պատվիրակությունները կնստեն առանձին սենյակներում, մինչդեռ պակիստանցի պաշտոնյաները կփոխանակեն առաջարկները նրանց միջև՝ կրկնելով Օմանի միջնորդությամբ անցկացված բանակցությունների նախորդ փուլերում օգտագործված ձևաչափը։

ԱՄՆ փոխնախագահ Ջեյ Դի Վենսը գլխավորում է Վաշինգտոնի պատվիրակությունը՝ նախագահ Դոնալդ Թրամփի հատուկ բանագնացներ Սթիվ Ուիթկոֆի և Ջարեդ Քուշների ուղեկցությամբ։

Ակնկալվում է, որ իրանական պատվիրակությունը կգլխավորեն Իրանի խորհրդարանի խոսնակ Մոհամմադ Բաղեր Ղալիբաֆը և արտգործնախարար Աբբաս Արաղչին, սակայն Թեհրանից Իրանի մասնակցության վերաբերյալ դեռևս հակասական հաղորդագրություններ են ստացվում։

«Պատերազմը դադարեցնելու համար բանակցությունների անցկացումը կախված է ԱՄՆ-ի կողմից բոլոր ճակատներում, մասնավորապես, Լիբանանում, հրադադարի վերաբերյալ իր պարտավորությունների կատարումից։ Երբ ուղևորության ծրագիրը վերջնականապես հաստատվի, կհայտարարվի նաև պատվիրակության կազմը»,- հայտարարել է Իրանի ԱԳՆ խոսնակը՝ անդրադառնալով Լիբանանում «Հըզբոլլահի» թիրախներին Իսրայելի շարունակական հարձակումներին։

Հայտնի չէ նաև՝ արդյո՞ք հանդիպմանը Իրանի Իսլամական հեղափոխության պահապանների կորպուսի (ԻՀՊԿ) որևէ ակտիվ անդամ կմասնակցի, սակայն Կորպուսը հայտարարել է, որ հավատարիմ է հրադադարին։

«Մենք կցանկանայինք տեղեկացնել ձեզ, որ Իրանի ԶՈՒ-ն մինչ այժմ հրադադարի ժամերի ընթացքում որևէ երկրի ուղղությամբ ոչինչ չեն արձակել»,- ասվում է հայտարարության մեջ։

Թարգմանությունը՝ Էմմա Չոբանյանի