06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
Նեթանյահուն զգուշացնում է՝ Իսրայելը կշարունակի հարվածել «Հըզբոլլահին» որտեղ անհրաժեշտ է
Քաղաքականություն
09.04.2026 | 16:16
Իսրայելի վարչապետ Բենիամին Նեթանյահուն հայտարարել է, որ երկիրը «կշարունակի հարվածել «Հըզբոլլահին», որտեղ անհրաժեշտ է»։ Հայտարարությունը հաջորդել է Իսրայելի պաշտպանության բանակի տարածած այն տեղեկությանը, որ սպանել է «Հըզբոլլահի» առաջնորդ Նաիմ Քասեմի քարտուղար Ալի Յուսուֆ Հարշիին։
«Մեր ուղերձը հստակ է. ով էլ որ գործի Իսրայելի քաղաքացիական բնակչության դեմ, թիրախ կդառնա։ Մենք կշարունակենք հարվածել «Հըզբոլլահին», որտեղ անհրաժեշտ է, մինչև չվերականգնենք հյուսիսի բնակիչների լիակատար անվտանգությունը», – գրել է Նեթանյահուն X-ում եբրայերեն։
«Հարաշիի սպանությունից բացի, «Իսրայելի պաշտպանության բանակը հարվածներ է հասցրել հարավային Լիբանանում գտնվող ահաբեկչական ենթակառուցվածքների շարքին՝ հազարավոր զենքերի, հրթիռների և արձակման կայանների տեղափոխման համար օգտագործվող անցակետերին, ինչպես նաև զենքի պահեստներին, արձակման կայաններին և «Հըզբոլլահի» հրամանատարական կենտրոններին», – հավելել է Նեթանյահուն՝ կիսվելով հարձակումների տեսագրություններով։
«Մենք շարունակում ենք հարվածել «Հըզբոլլահին» ուժով, ճշգրտությամբ և վճռականությամբ», – ասել է նա։
Իսրայելի և «Հըզբոլլահի» միջև մարտերը շարունակվում են այն բանից հետո, երբ ԱՄՆ-ն երեքշաբթի օրը երկշաբաթյա հրադադարի համաձայնագիր կնքեց Իրանի հետ: Վաշինգտոնը, Թեհրանը, Երուսաղեմը և միջնորդ երկրները հակասական պնդումներ են ներկայացրել այն մասին, թե արդյոք հրադադարը վերաբերում է «Հըզբոլլահ» դեմ մարտերին ու Լիբանանին։
«Հըզբոլլահը» ստանձնել է գիշերը Իսրայելի հյուսիսային մասի վրա հրթիռներ արձակելու պատասխանատվությունը՝ հրադադարի սկսվելուց ի վեր իր առաջին հարձակումների ժամանակ, նշելով, որ դա տեղի է ունեցել ի պատասխան Իսրայելի կողմից երեկ Լիբանանի վրա իրականացված խոշոր հարվածների, որոնք նա որակել է որպես հրադադարի խախտումներ։
Թարգմանությունը`Էմմա Չոբանյանի
