Հունգարիան և Ռուսաստանը գաղտնի համագործակցության համաձայնագիր են կնքել

Հունգարիան և Ռուսաստանը գաղտնի կերպով համագործակցության համաձայնագիր են ստորագրել։ Այն վերաբերում է երկու երկրների միջև տնտեսական, առևտրային, էներգետիկ, մարզական, կրթական և մշակութային կապերի ընդլայնմանը։ Այս մասին հաղորդում է Politico-ն՝ հղում անելով իր տրամադրության տակ գտնվող փաստաթղթերի, գրում է Current time-ը։ 

Լրատվամիջոցը նշում է, որ չի կարողացել հաստատել փաստաթղթերի իսկությունը։

Լրագրողների փոխանցմամբ՝ 2025 թվականի դեկտեմբերին Մոսկվայում կայացած հանդիպումից հետո Հունգարիայի արտաքին գործերի նախարար Պետեր Սիյարտոն և Ռուսաստանի առողջապահության նախարար Միխայիլ Մուրաշկոն ստորագրել են 12 կետից բաղկացած ծրագիր, որը նախանշում է երկու երկրների միջև համագործակցության հիմնական ուղղությունները։

Առևտրատնտեսական համագործակցությանն առնչվող փաստաթղթերից մեկում նշվում է, որ Մոսկվան և Բուդապեշտը պարտավորվում են «հաղթահարել երկկողմ առևտրի բացասական միտումը», որը պայմանավորված է եվրոպական պատժամիջոցներով։ Մասնավորապես, ռուսական ընկերություններին հնարավորություն կտրվի Հունգարիայում իրականացնել նոր նախագծեր էներգետիկայի, նավթի և գազի, ինչպես նաև միջուկային ոլորտներում։

Հունգարիայի իշխանությունները նաև համաձայնել են ուսումնասիրել երկրում ռուսերենի ուսուցման ընդլայնման և Ռուսաստանի հետ ուսանողների փոխանակման ծրագրերի ներդրման հնարավորությունը։

Մեկ այլ փաստաթղթում նշվում է, որ Ռուսաստանի հետ ավելի սերտ համագործակցությունը չպետք է «հակասի Հունգարիայի պարտավորություններին» որպես Եվրամիության անդամ։

Այս փաստաթղթերի բովանդակության վերաբերյալ հարցին պատասխանելով՝ Սիյարտոն հայտարարել է, որ «Հունգարիայի երկկողմ համագործակցությունը ղեկավարվում է ազգային շահերով, այլ ոչ թե որևէ արտաքին ճնշմամբ, որը կստիպի երկրին համապատասխանել կողմնակալ լիբերալ լրատվամիջոցների պահանջներին»։

Հիշեցնենք, որ ավելի վաղ Bloomberg-ը հայտնել էր, թե Հունգարիայի վարչապետ Վիկտոր Օրբանը 2025 թվականի հոկտեմբերին Ռուսաստանի նախագահ Վլադիմիր Պուտինի հետ հեռախոսազրույցի ընթացքում իրեն համեմատել է «մկան» հետ, որն օգնում է «առյուծին»։

Թարգմանությունը`Էմմա Չոբանյանի