29.09.2026 | 13:58
«BYD» և «Changan» մեքենաների ներմուծման պատրվակով 13 անձից հափշտակել է 78.3 մլն դրամ․ ՔԿ
Պուտինի հետ զրույցում Օրբանն իրեն համեմատել է մկան հետ, որը առյուծին ցանցից ազատում է. Bloomberg
Քաղաքականություն
07.04.2026 | 19:02
Հունգարիայի վարչապետ Վիկտոր Օրբանը 2025 թվականի հոկտեմբերին Ռուսաստանի նախագահ Վլադիմիր Պուտինի հետ հեռախոսազրույցի ժամանակ իրեն համեմատել է «մկան» հետ, որն օգնում է «առյուծին», գրում է Meduza-ն։
Օրբանի և Պուտինի միջև զրույցը տեղի է ունեցել հոկտեմբերի 17-ի կեսօրին։ Գործակալության աղբյուրը հաստատել է Հունգարիայի կառավարության կողմից պատրաստված ձայնագրության իսկությունը։ Հեռախոսազրույցում Օրբանն ասել է, որ «պատրաստ է մեծ ջանքեր գործադրել» Պուտինին օգնելու համար, այդ թվում՝ Ուկրաինայի պատերազմի կարգավորման և Բուդապեշտում ԱՄՆ-ի հետ գագաթնաժողով կազմակերպելու հարցում։
«Երեկ մեր բարեկամությունը հասավ այնքան բարձր մակարդակի, որ ես կարող եմ ձեզ օգնել ամեն ինչում: Ես ձեր տրամադրության տակ եմ ամեն հարցում, որտեղ կարող եմ օգնել», – Օրբանի խոսքերն է մեջբերում Bloomberg-ը: Այս խոսքերը հաստատելու համար Օրբանը մեջբերել է Եզոպոսի առակի վրա հիմնված հունգարական հայտնի մանկական հեքիաթ, որտեղ մուկը առյուծին ազատում է ցանցից, այն բանից հետո, երբ առյուծը փրկում է նրա կյանքը: Սա, ըստ ձայնագրության, Պուտինին ծիծաղեցրել է։
Bloomberg-ը հաղորդում է, որ երկուսը զրույցի մեծ մասն անցկացրել են «շնորհակալություն հայտնելով միմյանց, ինչպես նաև Դոնալդ Թրամփին», որի հետ Պուտինը և Օրբանը նախորդ օրը խոսել էին Բուդապեշտում կայանալիք Ռուսաստան-ԱՄՆ հնարավոր գագաթնաժողովի մասին, որը, ի վերջո, այդպես էլ տեղի չունեցավ:
Պուտինի հետ զրույցում Օրբանը նաև ափսոսանք է հայտնում, որ կորոնավիրուսի համավարակից ի վեր նրանք չեն կարողացել անձամբ հանդիպել այնքան կանոնավոր, որքան նախկինում։ Ի պատասխան՝ Պուտինը գովաբանել է Հունգարիայի «անկախ և ճկուն» դիրքորոշումը Ուկրաինայի պատերազմի հարցում։
The Washington Post-ը հաղորդել էր, որ Հունգարիայի արտաքին գործերի նախարար Պետեր Սիյարտոն ԵՄ գագաթնաժողովների ընդմիջումների ժամանակ անմիջականորեն շփվել է Ռուսաստանի արտաքին գործերի նախարար Սերգեյ Լավրովի հետ՝ նրան տեղեկացնելով բանակցությունների ընթացքի մասին:
Թարգմանությունը՝ Էմմա Չոբանյանի
