Ինչու «Նժար»-ը միացավ «Բոլորին դեմ եմ»-ին. Նինա Կարապետյանցը պարզաբանում է․ ՏԵՍԱՆՅՈՒԹ

Ինչո՞ւ «Նժար»-ը որոշեց միանալ «Բոլորին դեմ եմ» կուսակցությանը. այս մասին այսօր հրավիրված մամուլի ասուլիսի ժամանակ պարզաբանեց «Նժար» սահմանադրական շարժման համահիմնադիր, վարչապետի թեկնածու Նինա Կարապետյանցը.

«Տրամաբանությունը շատ պարզ էր՝ և՛ մենք, և՛ «Բոլորին դեմ եմ» շարժումն ուներ գրեթե համընկնող նպատակներ: «Բոլորին դեմ եմ»-ն ավելի փոքր մասշտաբ էր վերցրել, այնպես չէ, որ խնդիր կար ավելի ընդլայնելու, «Նժարը» այդպես էլ, ինչպես խոստացել էր, հերթական կուսակցությունը չգրանցեց, որովհետև մեր նպատակը կուսակցություն ունենալը չէր, այլ փորձել համախոհ մարդկանց, ազնիվ մղումներ ունեցող մարդկանց համախմբել, ստեղծել իրավիճակ, որտեղ գաղափարները հանուն Հայաստանի և ոչ թե փոքր ինչ-որ խմբերի շահերից ելնելով առաջ տանելն էր: Հետևաբար շատ տրամաբանական էր միանալը:

Եվ երկրորդը՝ մենք միշտ ասել ենք, որ քաղաքականության մեջ պետք է ձևավորվեն ընտրանի կամ էլիտաներ պետք է ձևավորվեն մի կողմից, մյուս կողմից էլ՝ սերնդափոխություն լինի, պետք է առողջ սերնդափոխություն լինի, ոչ թե մարդիկ, ովքեր զբաղմունք չունեն, գործ չունեն, այնպես ուրիշ տեղ իրենց չեն կարողանում ռեալիզացնել, գան մասնակցեն քաղաքական պրոցեսներին, այլ լինեն մարդիկ, ովքեր ամեն ինչ ունեն՝ և՛ մասնագիտություն ունեն, և՛ աշխատանք, և՛ բավարար վաստակ, և՛ երջանիկ ու ինքնաբավ են, փաստորեն ունեն ամեն ինչ, ուղղակի այս միջավայրը, այս իրավիճակը իրենց չի բավարարում: Հետևաբար, շատ տրամաբանական էր սերունդների այսպես համերաշխությունը ցուցաբերելով գալ միանալ միասին, հատկապես որ «Բոլորին դեմ եմ»-ն արդեն գրանցել էր կուսակցություն, ուներ համակարգված միջուկ, և մենք վստահ ենք, որ այս պրոցեսը կարող է լինել շատ ավելի երկարատև: Մենք կմասնակցենք այս ընտրություններին մի ֆորմատով, հետո ենթադրում եմ, որ հնարավորություն կլինի նաև շարունակել մեր պրոյեկտները կյանքի կոչել»։

Մանրամասները՝ տեսանյութում։