17.08.2026 | 18:00
ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի թեկնածուն Լիլիթ Գալստյանն է
Նոր աղբավայր կառուցելու պրոցես խնդրում եմ չքննարկել, վերամշակաման գործարան պետք է կառուցվի․ Ավինյան. ՏԵՍԱՆՅՈՒԹ
Տնտեսություն
06.04.2026 | 11:44
Երևանի քաղաքապետարանի գործակարգավարական խորհրդակցության ժամանակ քաղաքապետ Տիգրան Ավինյանը խստորեն արձագանքեց նոր աղբավայրի կառուցման վերաբերյալ զեկույցին՝ ընդգծելով, որ քաղաքի առաջնահերթությունը ոչ թե աղբը թաղելն է, այլ վերամշակելը։
«Երևանի կառուցապատման ներդրումային ծրագրերի իրականացման գրասենյակ» ՀՈԱԿ-ի տնօրեն Անետա Բաբայանը զեկուցեց, որ ՎԶԵԲ-ի հետ համատեղ իրականացվող երկու միջազգային մրցույթները հաջողությամբ կայացել են։ Նա նշեց, որ մինչև մայիսի 20-ը նախատեսվում է մեկնարկային հանդիպում հաղթող խորհրդատվական ընկերության հետ, իսկ տարեվերջին հնարավոր կլինի սկսել բուն աղբավայրի կառուցման մրցույթը։
Լսելով «նոր աղբավայրի կառուցում» ձևակերպումը՝ Ավինյանը ընդհատեց զեկուցողին։
«Մեր նպատակը նոր աղբավայր կառուցելը չէ բացարձակապես։ Մեր նպատակն է ունենալ աղբի վերամշակման նոր գործարան, որը պետք է կլանի Երևանի և մերձակա մարզերի ամբողջ աղբը։ Եթե այս պրոցեսը չի հանգեցնում գործարանի կառուցմանը, անիմաստ ռեսուրս չարժի ծախսել»,- հայտարարեց քաղաքապետը։
Զեկուցողը պարզաբանեց, որ նույնիսկ վերամշակման գործարանի առկայության դեպքում, ըստ տեխնիկական պահանջների, անհրաժեշտ է ունենալ սանիտարական աղբավայր որոշակի մնացորդային ծավալների համար։ Ծրագիրը նաև ներառում է Նուբարաշենի և Աջափնյակի գործող աղբավայրերի կոնսերվացումը։
Ավինյանը վերահաստատեց իր դիրքորոշումը՝ նշելով, որ չի հանդուրժի որևէ «կոմպրոմիսային» տարբերակ, որտեղ ծրագիրը կսահմանափակվի միայն նոր աղբավայրով։
Նա նաև դիմեց մրցույթի մասնակից ընկերություններին՝ հորդորելով ներկայացնել իրատեսական առաջարկներ, քանի որ գնահատման ժամանակ հիմնական գործոնը լինելու է ծրագրի իրականացման հնարավորությունը, այլ ոչ թե թղթի վրա գեղեցիկ թվերը։
Մանրամասները՝ տեսանյութում։
