«Ղարաբաղի թեման չի կարող լինել քաղաքական շահարկումների առարկա». Բաքուն արձագանքել է Մոսկվային

Ադրբեջանի արտաքին գործերի նախարարությունը մեկնաբանել է Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի՝ ապրիլի 1-ին Մոսկվայում կայացած հանդիպման ժամանակ, ինչպես նաև ռուսաստանցի այլ պաշտոնյաների կողմից Ղարաբաղի վերաբերյալ արված հայտարարությունները, գրում են ադրբեջանական լրատվամիջոցները։

Ըստ Բաքվի՝ այս հարցը վերաբերում է բացառապես Ադրբեջանի ներքին գործերին։ Նշվում է, թե այդ կապակցությամբ «Բաքվի դիրքորոշումը՝ Ադրբեջանի Ղարաբաղի տարածաշրջանը քաղաքական շահարկումների համար օգտագործելու անընդունելիության և նման գործելակերպը դադարեցնելու անհրաժեշտության վերաբերյալ, դիվանագիտական ​​խողովակներով փոխանցվել է Ռուսաստանի նախագահի աշխատակազմին, Ռուսաստանի կառավարությանը և Ռուսաստանի արտաքին գործերի նախարարությանը»։

Նշվում է, թե այնուամենայնիվ, այս թեման կրկին բարձրացվում է ռուսական կողմի պաշտոնական քաղաքական դիսկուրսում:«Վեստի» հեռուստաալիքին տված հարցազրույցում, Ռուսաստանի նախագահի մամուլի քարտուղար Դմիտրի Պեսկովը, արտահայտելով իր դիրքորոշումը հայ-ռուսական հարաբերությունների վերաբերյալ, կրկին մեկնաբանել է այն հարցը, թե ո՞վ էր առաջինը՝ Ռուսաստանը, թե՞ Հայաստանը, որ ճանաչել է Ղարաբաղը որպես Ադրբեջանի մաս:

«Այն փաստը, որ Ղարաբաղը Ադրբեջանի անբաժանելի մասն է, հիմնված է ոչ թե որևէ պետության որոշման, այլ պատմության, միջազգային իրավունքի և արդարության վրա։ Սա վերահաստատվեց և վերջնականապես ամրապնդվեց 2020 թվականի 44-օրյա Հայրենական պատերազմի և 2023 թվականի հակաահաբեկչական գործողության արդյունքներով», – ասվում է  հայտարարության մեջ։

Ադրբեջանի ԱԳՆ-ն նշել է, թե ոչ մի երկիր, այդ թվում՝ Ռուսաստանի Դաշնությունը, «երբեք կասկածի տակ չի դրել Ադրբեջանի տարածքային ամբողջականությունը, այդ թվում՝ Ղարաբաղյան տարածաշրջանը»։

«Մենք ևս մեկ անգամ  ռուսական կողմի ուշադրությունն ենք հրավիրում նրա վրա, որ Ադրբեջանի ինքնիշխանությանը վերաբերող հարցերը չպետք է դառնան հարաբերությունների հրապարակային պարզաբանման առարկա ռուս-հայկական հարաբերությունների ներկայիս դժվարին ժամանակաշրջանում», – ասվում է հայտարարության մեջ։

Ավելի վաղ Ռուսաստանի նախագահի մամուլի քարտուղար Դմիտրի Պեսկովը հայտարարել էր, որ Հայաստանի իշխանությունները իրենք են Լեռնային Ղարաբաղի  պատկանելության հարցի վերաբերյալ որոշում կայացրել։

«Միակ բանը, որ նախագահ Պուտինը ցանկանում է, և միակ բանը, որ Ռուսաստանը ցանկանում է, այն է, որ այս հարցը քննարկելիս մեզ  ուղղված ավելորդ հղումներ չլինեն», – ասել էր նա «Վեստի» լրատվական ծառայության հեղինակ Պավել Զարուբինի հետ հարցազրույցում։

Պեսկովի խոսքով՝ Ղարաբաղի պատկանելության վերաբերյալ որոշումը կայացրել են Հայաստանի իշխանությունները։

«Ռուսաստանը բացարձակապես կապ չունի դրա հետ», – նշել էր  Կրեմլի խոսնակը։

Թարգմանությունը`Էմմա Չոբանյանի