ԱՄՆ-ը հայտարարել է, որ «ավելի խորը» կհարվածի Իրանին

ԱՄՆ զինված ուժերի միացյալ շտաբի պետ, գեներալ Դեն Քեյնը հայտարարել է, որ Իրանում օդային գերակայություն հաստատելուց հետո ԱՄՆ-ն «այժմ կսկսի ընդլայնվել դեպի ցամաքային մաս», գրում է CNN-ը։

«ԱՄՆ ուժերը կհարվածեն աստիճանաբար ավելի խորը Իրանի տարածք և կստեղծեն լրացուցիչ մանևրելու ազատություն ԱՄՆ ուժերի համար»,- հավելել է Քեյնը։

Նրա մեկնաբանությունները հնչում են այն բանից հետո, երբ ԱՄՆ պաշտպանության նախարար Փիթ Հեգսեթը հայտարարել է, որ ամերիկյան գործողությունը դեռևս «վաղ» փուլում է՝ հավելելով, որ ԱՄՆ-ն այժմ կարագացնի ռազմական գործողությունները։ Նա նաև հայտարարել է, որ Իրանի կողմից հրթիռների արձակումները կտրուկ նվազել են ԱՄՆ-ի և Իսրայելի հարվածների մեկնարկից ի վեր՝ դա նկարագրելով որպես ԱՄՆ ուժերի կողմից տարածաշրջանում «կայուն առաջընթաց»։

«Այսօր առավոտվա դրությամբ՝ ԱՄՆ Կենտրոնական հրամանատարությունը կայուն առաջընթաց է գրանցում։ Իրանի կողմից բալիստիկ հրթիռների արձակումը մարտական ​​գործողությունների առաջին օրվանից 86%-ով նվազել է»,- ասել է Քեյնը։

Նա հավելել է, որ վերջին ժամերին անկումն արագացել է։

«Վերջին 24 ժամվա ընթացքում միայն 23% անկում է գրանցվել»,- ասել է Քեյնը։

Ըստ նրա՝ հրթիռային և անօդաչու թռչող սարքերի ակտիվության նվազումը թույլ է տվել ԱՄՆ ուժերին ընդլայնել իրենց գործառնական առավելությունը։

«Այս առաջընթացը թույլ է տվել CENTCOM-ին հաստատել տեղայնացված օդային գերակայություն Իրանի ափի հարավային թևում և թափանցել նրանց պաշտպանությունը ճնշող ճշգրտությամբ և կրակային հզորությամբ»,- նշել է նա։

Թարգմանությունը՝ Էմմա Չոբանյանի