27.10.2026 | 00:08
Վարդան Մինասյանն աշխատանքի է անցել Լիբանանում
Իսրայելը հայտնել է Բեյրութի և Թեհրանի վրա «միաժամանակյա հարվածների» մասին
Քաղաքականություն
03.03.2026 | 11:52
Իսրայելի բանակը հայտարարել է, որ միաժամանակյա հարվածներ է հասցնում Թեհրանին և Բեյրութին, գրում է France 24-ը։
«Իսրայելի բանակը ներկայում միաժամանակյա հարվածներ է հասցնում Թեհրանում և Բեյրութում։ Իսրայելի ռազմաօդային ուժերը սկսել են թիրախային հարվածներ հասցնել Իրանի ահաբեկչական ռեժիմի և «Հըզբոլլահ» ահաբեկչական կազմակերպության ռազմական օբյեկտներին»,- հայտարարել է Իսրայելի բանակը։
Հարվածները տեղի են ունեցել շուրջ մեկ ժամ անց այն բանից, երբ Իսրայելի բանակն «անհետաձգելի նախազգուշացում» էր տարածել Բեյրութի հարավային արվարձանների և տասնյակ գյուղերի բնակիչների համար՝ կոչ անելով տարհանվել: Իսրայելական կողմը հայտարարել էր, որ թիրախավորում է «Հըզբոլլահ»-ին պատկանող հրամանատարական կենտրոններն ու պահեստները:
Իսրայելի ԶՈՒ-ն հայտարարել է, որ իրենց զորքերը հարավային Լիբանանի սահմանի երկայնքով գործում են որպես «մարտավարական միջոց», սակայն հերքել են որևէ ցամաքային գործողության անցկացումը։
Լիբանանյան «Հըզբոլլահ» խմբավորումը հայտարարել է, որ թիրախավորել է Իսրայելի երեք ռազմաբազա՝ ի պատասխան Լիբանանում խմբավորման հենակետերի, այդ թվում՝ Բեյրութի հարավային արվարձանների վրա հարվածների։
«Ի պատասխան Լիբանանի տասնյակ քաղաքների վրա Իսրայելի հանցավոր ագրեսիայի՝ «Հըզբոլլահ»-ի զինյալներն անօդաչու թռչող սարքերով թիրախավորել են Իսրայելի հյուսիսում գտնվող Ռամատ Դավիդի ավիաբազան և Մերոնի բազան»,- ասվում է Իրանի կողմից աջակցվող խմբավորման հայտարարությունում։
Հաղորդվում է, որ հրթիռային հարվածով թիրախավորվել է նաև օկուպացված Գոլանի բարձունքներում գտնվող բազան։
Թարգմանությունը՝ Էմմա Չոբանյանի
