ԱՄՆ-ն և Ռուսաստանը Ժնևում քննարկել են միջուկային զենքի մասին պայմանագիրը

Ռուսաստանի և ԱՄՆ-ի  ներկայացուցիչները հանդիպել են Ժնևում երկուշաբթի՝ փետրվարի 23-ին, որպեսզի քննարկեն միջուկային զենքի վերահսկման հնարավոր պայմանագիրը: Ամերիկյան պատվիրակության և Չինաստանի ներկայացուցիչների միջև նմանատիպ բանակցություններ նախատեսված են երեքշաբթի օրը, հաղորդում են Reuters-ը և AFP-ն՝ հղում անելով ԱՄՆ Պետդեպարտամենտի բարձրաստիճան պաշտոնյային, գրում է DW-ի ռուսական ծառայությունը:

Վաշինգտոնը ցանկանում է հասնել երեք երկրների մասնակցությամբ «լայն համաձայնագրի» կնքման։ Փաստաթղթի շուրջ բանակցությունները սկսվել են այն բանից հետո, երբ փետրվարի 5-ին լրացավ Միացյալ Նահանգների և Ռուսաստանի միջև 2010 թվականին ստորագրված նոր ռազմավարական սպառազինությունների կրճատման պայմանագիրը (СНВ-3):

Երկու գործակալությունների աղբյուրները նաև նշում են, որ ԱՄՆ-ն փետրվարին նմանատիպ երկկողմ բանակցություններ է անցկացրել Մեծ Բրիտանիայի և Ֆրանսիայի հետ: Այս երկրները ոչ միայն ունեն միջուկային զինանոցներ, այլև Ռուսաստանի, ԱՄՆ-ի և Չինաստանի հետ միասին, ՄԱԿ-ի Անվտանգության խորհրդի մշտական ​​անդամներ են: Աղբյուրի խոսքով՝ բանակցությունները «լավ» են անցել, և ամերիկյան կողմը լավատեսորեն է տրամադրված:

Փետրվարի 6-ին՝ պայմանագրի ժամկետի ավարտից մեկ օր անց, Ժնևում ՄԱԿ-ի գրասենյակում և այլ միջազգային կազմակերպություններում Ռուսաստանի մշտական ​​ներկայացուցիչ Գենադի Գատիլովը հայտարարել էր, որ Մեծ Բրիտանիան և Ֆրանսիան պետք է մասնակցեն միջուկային զենքի վերահսկման վերաբերյալ քննարկումներին։

«Եթե մենք լրջորեն դիտարկենք միջուկային զենքի վերահսկման, և հատկապես բազմակողմ միջուկային զենքի կրճատման վերաբերյալ բազմակողմանի երկխոսությունը, ապա Ռուսաստանի համար հիմնարար նշանակություն կունենա Մեծ Բրիտանիայի և Ֆրանսիայի, որոնք ԱՄՆ-ի ռազմական դաշնակիցներն են ՆԱՏՕ-ում, ներգրավելը նման փոխգործակցության մեջ», – ասել էր  նա՝ ելույթ ունենալով Ժնևում հունվարի 19-ից մարտի 27-ը անցկացվող զինաթափման համաժողովում։

Ինչպես նշում է AFP-ն, ԱՄՆ-ն փետրվարի սկզբին Վաշինգտոնում «նախապատրաստական ​​հանդիպումներ» է անցկացրել Ռուսաստանի և Չինաստանի հետ։ Համեմատության համար, Ժնևում բանակցությունները «մի փոքր ավելի բովանդակալից» էին, գրում է գործակալությունը։ Մինչդեռ, Չինաստանի զինաթափման հարցերով դեսպան Շեն Ցզյանը նախկինում հայտարարել էր, որ իր երկիրը այս փուլում չի մասնակցի Ռուսաստանի և ԱՄՆ-ի հետ բանակցություններին։ Նա ընդգծել է, որ Պեկինը շատ ավելի փոքր միջուկային զենքի պաշար ունի, քան Մոսկվան և Վաշինգտոնը։

Փետրվարի 21-ին ամերիկյան CNN հեռուստաալիքը, հղում անելով աղբյուրներին, հաղորդել էր, որ ԱՄՆ իշխանությունները կասկածում են Չինաստանին միջուկային զենքի նոր սերնդի մշակման և 2020 թվականի հունիսին առնվազն մեկ գաղտնի միջուկային փորձարկում անցկացնելու մեջ։ Ըստ լրատվամիջոցների՝ սա ենթադրում է հրթիռային համակարգերի ստեղծում, որոնք կարող են կրել բազմաթիվ փոքր միջուկային մարտագլխիկներ։

Թարգմանությունը՝ Էմմա Չոբանյանի