Հունգարիան վետո է դրել ՌԴ-ի դեմ ԵՄ-ի նոր պատժամիջոցների և Ուկրաինային վարկ տրամադրելու որոշման վրա

Հունգարիան վետո է դրել Ռուսաստանի դեմ պատժամիջոցների և Ուկրաինային 90 միլիարդ եվրոյի վարկ տրամադրելու վերաբերյալ ԵՄ որոշումների վրա։ Այս մասին հայտարարել է Հունգարիայի արտաքին գործերի նախարար Պետեր Սիյարտոն, գրում է ՌԲԿ-ն։

«Այսօրվա հանդիպման ժամանակ ես հստակեցրել եմ, որ մենք չենք աջակցում 20-րդ պատժամիջոցների փաթեթին և չենք թույլատրում այն։ Եվ ես հստակեցրել եմ, որ մենք չենք համաձայնի Ուկրաինային 90 միլիարդ եվրոյի ռազմական վարկ տալուն», – ասել է նա Բրյուսելում կայացած հանդիպումից հետո։

Սիյրտոն նշել է, որ Կիևը չպետք է «շանտաժի կամ վտանգի ենթարկի Հունգարիայի էներգետիկ անվտանգությունը՝ Բրյուսելի և հունգարական ընդդիմության հետ համաձայնության գալով»։

«Մինչև Ուկրաինան չվերականգնի նավթի մատակարարումները Հունգարիա, մենք մտադրություն չունենք աջակցելու Բրյուսելում որևէ որոշման, որը օգտակար կլինի Ուկրաինայի համար կամ կարևոր կլինի ուկրաինացիների համար։ Այսպիսով, նրանք հասանելիություն չեն ունենա ո՛չ ռազմական վարկին, ո՛չ էլ 20-րդ պատժամիջոցների փաթեթին։ Եվ սա կմնա այդպես այնքան ժամանակ, քանի դեռ նրանք խաղեր են խաղում մեզ հետ մեր էներգամատակարարման հարցում», – հավելել է նա։

Ավելի վաղ Եվրամիության  դիվանագիտության ղեկավար Կայա Կալասը հայտարարել էր, որ ԵՄ դեսպանները, հավանաբար, չեն կարողանա հաստատել Ռուսաստանի դեմ ԵՄ հակապատերազմական պատժամիջոցների նոր՝ 20-րդ փաթեթը  փետրվարի 23-ին:

Թարգմանությունը` Էմմա Չոբանյանի