ՌԴ-ն Անքորիջում ընդունել է ԱՄՆ-ի առաջարկները, բայց հիմա Վաշինգտոնը պատրաստ չէ դրանց. Լավրով

Ռուսաստանի ԱԳ նախարար Սերգեյ Լավրովը TV BRICS-ին տված հարցազրույցում հայտարարել է, որ Միացյալ Նահանգները հիմա պատրաստ չէ իրականացնել Ուկրաինայի վերաբերյալ իր առաջարկները, որոնք արվել են երկու երկրների նախագահներ Վլադիմիր Պուտինի և Դոնալդ Թրամփի՝ Անքորիջում հանդիպման ժամանակ, գրում է Meduza-ն։

Լավրովի խոսքով՝ Թրամփի վարչակազմը «չի վիճարկում» իր նախորդի՝ Ջո Բայդենի կողմից ընդունված հակառուսական պատժամիջոցների օրենքները։ Միաժամանակ, նա հիշեցրել է, որ Թրամփի պաշտոնավարման օրոք ԱՄՆ-ը պատժամիջոցներ է կիրառել «Լուկօյլ»-ի և «Ռոսնեֆտ»-ի դեմ, «և դա արել են աշնանը՝ Պուտինի և Թրամփի միջև Անքորիջում կայացած շատ լավ հանդիպումից մի քանի շաբաթ անց»։

«Այսպիսով, մեզ թվում է, թե ասում են, որ ուկրաինական խնդիրը պետք է լուծվի։ Անքորիջում մենք ընդունեցինք Միացյալ Նահանգների առաջարկը։ Այսպիսով, եթե մենք այդպես մոտենանք դրան, ինչպես տղամարդիկ, նրանք առաջարկեցին, մենք ընդունեցինք, և խնդիրը պետք է լուծվի։ Անկախ նրանից, թե ինչ են ասում Ուկրաինայում կամ Եվրոպայում, մենք խորապես գիտակցում ենք Եվրամիության մեծ մասի ռեժիմների խորը ռուսատյացությունը՝ բացառությամբ հազվագյուտ դեպքերի։ Մեզ համար կարևոր էր ԱՄՆ-ի դիրքորոշումը։ Եվ այսպես, ընդունելով նրանց առաջարկները՝ մենք, կարծես, կատարեցինք ուկրաինական հարցը լուծելու և լիարժեք, լայն ու փոխշահավետ համագործակցության անցնելու խնդիրը։ Գործնականում ամեն ինչ հակառակն է. նոր պատժամիջոցներ են սահմանվում, պատերազմ է մղվում լցանավերի դեմ բաց ծովում՝ խախտելով Ծովային իրավունքի մասին կոնվենցիան: Նրանք փորձում են արգելել Հնդկաստանին և մեր մյուս գործընկերներին գնել մատչելի ռուսական էներգակիրներ»,- ասել է նա։

Թարգմանությունը՝ Էմմա Չոբանյանի