06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
Իրանը Նոբելյան մրցանակակիր Նարգիզ Մոհամմադիին 7,5 տարվա ազատազրկման է դատապարտել
Քաղաքականություն
09.02.2026 | 11:23
Իրանը Խաղաղության Նոբելյան մրցանակի դափնեկիր Նարգիզ Մոհամմադիին դատապարտել է 7,5 տարվա ազատազրկման՝ հացադուլ սկսելուց հետո, հայտարարել են նրա կողմնակիցները։ Այսպիսով, Թեհրանը խստացնում է բոլոր այլախոհների դեմ պայքարը՝ համազգային բողոքի ցույցերից և հազարավոր մարդկանց մահից հետո, գրում է The Guardian-ը։
Մոհամմադիի փաստաբան Մոստաֆա Նիլին X-ում գրառմամբ հաստատել է դատավճիռը՝ նշեով, որ այն կայացվել է շաբաթ՝ Մաշհադ քաղաքի դատարանի կողմից:
«Նա դատապարտվել է վեց տարվա ազատազրկման՝ «հանդիպումների և դավադրության» համար, ինչպես նաև ևս մեկուկես տարվա բանտարկության ու երկամյա ճանապարհորդության արգելքի՝ քարոզչության համար»,- գրել է նա։
Իրանը դեռևս չի հաստատել դատավճիռը։
Աջակիցները պնդում են, որ Մոհամմադին հացադուլ է հայտարարել փետրվարի 2-ից։ Նա ձերբակալվել է դեկտեմբերին՝ Մաշհադում բնակվող 46-ամյա իրանցի փաստաբան և մարդու իրավունքների պաշտպան Խոսրո Ալիքորդիի հիշատակի արարողության ժամանակ։ Ցույցի տեսանյութում երևում է, թե ինչպես է նա արդարադատություն պահանջում Ալիքորդիի և մյուսների համար։
Դեկտեմբերի ձերբակալությունից ամիսներ առաջ նրա կողմնակիցները զգուշացրել էին, որ 53-ամյա Մոհամմադին կրկին վտանգի տակ է՝ 2024 թվականի դեկտեմբերին վաղաժամկետ ազատ արձակվելուց հետո՝ առողջական խնդիրների պատճառով։
Ազատ արձակվելուց Մոհամմադին շարունակել է հանրային ակտիվությունը՝ մասնակցելով բողոքի ցույցերի և հայտնվելով միջազգային լրատվամիջոցներում, այդ թվում՝ Թեհրանի հայտնի Էվին բանտի մոտ ցույցին, որտեղ նա պահվում էր։ Նա 13 տարի և 9 ամիս ժամկետով ազատազրկման պատիժն էր կրում՝ պետական անվտանգության դեմ դավադրության և Իրանի կառավարության դեմ քարոզչություն տարածելու մեղադրանքով։
Նոբելյան մրցանակակիրը նաև աջակցել է Մահսա Ամինիի մահից հետո 2022 թվականին բռնկված համազգային բողոքի ցույցերին, որոնց ընթացքում կանայք բացահայտորեն մարտահրավեր նետեցին կառավարությանը՝ հրաժարվելով հիջաբ կրել։
Մոհամմադին բանտարկության ժամանակ մի քանի սրտի կաթված է ստացել՝ նախքան 2022 թվականին շտապ վիրահատության ենթարկվելը: 2024 թվականի վերջին նրա փաստաբանը հայտնել էր, որ բժիշկները Մոհամմադիի մոտ հայտնաբերել են ոսկրային վնասվածք, որը, նրանց կարծիքով, կարող է քաղցկեղային լինել, և որը հետագայում հեռացվել է։
«Հաշվի առնելով նրա հիվանդությունները՝ ենթադրվում էր, որ նա ժամանակավորապես ազատ կարձակվի գրավի դիմաց, որպեսզի կարողանա բուժում ստանալ»,- գրել էր Նիլին։
Այնուամենայնիվ, ցույցերից ի վեր իրանցի պաշտոնյաներն ավելի կոշտ դիրքորոշում են որդեգրել բոլոր այլախոհների նկատմամբ։
Թարգմանությունը՝ Էմմա Չոբանյանի
