30.05.2026 | 10:27
ՌԴ-ն Կոպիրկինին կանչել է Մոսկվա՝ ՀՀ–ԵՄ մերձեցման պատճառով
Վրաստանը ՀՀ-ի և Ադրբեջանի ուղիղ հաղորդակցության հետևանքով տարանցման համար սպառնալիք չի տեսնում․ Կոբախիձե
Քաղաքականություն
23.01.2026 | 18:36
Վրաստանի վարչապետ Իրակլի Կոբախիձեն չի կարծում, որ Հայաստանի և Ադրբեջանի միջև նոր ուղիղ բեռնափոխադրման երթուղիները կարող են սպառնալ երկրի տարանցիկ գործառույթներին: Նա այս մասին հայտարարել է «Իմեդի» հեռուստաալիքին տված հարցազրույցում, գրում է News Georgia-ն։
Կոբախիձեն նշել է, որ վերջին հինգ տարիների ընթացքում Միջին միջանցքով երկրով բեռնափոխադրումները յոթ անգամ աճել են: Հնարավոր տարանցիկ կորուստների մասին խոսակցությունները նա անվանել է «դատարկ ենթադրություններ»։
«Նման աճը հաշվի առնելով՝ այլընտրանքային միջանցքը պարզապես կլրացնի մեր տարանցիկ գործառույթը»,- ասել է Վրաստանի վարչապետը՝ ողջունելով երկու հարևան երկրների միջև հարաբերությունների վերականգնումը և նրանց միջև առևտրատնտեսական կապերի զարգացումը։
Նա հավելել է, որ Վրաստանը կշարունակի ամրապնդել իր տարանցիկ գործառույթները՝ ներդրումներ կատարելով ենթակառուցվածքներում, այդ թվում՝ ճանապարհներում, նավահանգիստներում և օդանավակայաններում։
Դավոսի Համաշխարհային տնտեսական ֆորումում Ադրբեջանի նախագահ Իլհամ Ալիևը հայտարարել էր, որ ապագայում Հայաստանից և Ռուսաստանից բեռները կարող են ուղղակիորեն անցնել Ադրբեջանի տարածքով՝ շրջանցելով Վրաստանը։
ՀՀ նախագահ Վահագն Խաչատուրյանը վերահաստատել էր այս դիրքորոշումը՝ նշելով, որ երկրները ծրագրում են գործարկել ուղիղ երթուղիներ Ադրբեջանի և Հայաստանի միջև։
Թարգմանությունը՝ Էմմա Չոբանյանի
