29.06.2026 | 12:03
Նորագյուղում գույքի փոխհատուցման չափը փոխվել է․ սեփականատերն իրավունք ունի ինքն ընտրել գնահատողին․ ՏԵՍԱՆՅՈՒԹ
UFC-ի նախագահն Արման Ծառուկյանին համեմատել է Ջոն Ջոնսի հետ
16.01.2026 | 12:47
UFC-ի նախագահ Դենա Ուայթը նշել է, թե ինչու թեթև քաշային կարգի դասակարգման առաջատար Արման Ծառուկյանն առայժմ չի ստանում չեմպիոնական մենամարտ անցկացնելու հնարավորությունը։
«Ծառուկյանը հնարավորություն ուներ, բայց նա բաց թողեց այն։ Այժմ նրան պետք է վերադարձնել չեմպիոնության հավակնորդի կարգավիճակը։ Ես ուզում եմ ունենալ մարտիկին վստահելու հնարավորություն, երբ նա ստանում է գոտու համար մենամարտելու շանս։ Ջոն Ջոնսի հետ էլ նույնն է։ Ինձ հարցնում են Սպիտակ տանը Ջոնսի մասնակցությամբ մենամարտի մասին, բայց կարո՞ղ եմ արդյոք վստահել Ջոնսին։
Այո, Ծառուկյանը հաղթեց Հուկերին, բայց նա քիչ էր մնում ձախողեր մենամարտը, երբ հայացքների մենամարտի ժամանակ գլխով հարվածեց Դենին։ Ոչ ոք չի կարող ասել, թե մենք Ծառուկյանին հնարավորություն չենք տվել իրեն դրսևորելու։ Նրա իրավիճակը չի կարելի համեմատել այն դեպքի հետ, երբ Բելալ Մուհամադը հաղթանակների շարքով էր գնում։ Նա արդարացիորեն հարցնում էր՝ քանի անգամ պետք է հաղթի, որ տիտղոսի համար մենամարտ ստանա։ Ծառուկյանի դեպքում ամեն ինչ այլ է։
Արմանը վերջերս է մենամարտել, և մենք որոշեցինք շեշտը դնել Գեյջի – Փիմբլեթ մենամարտի վրա։ Տեսնենք, թե հետո ինչ կլինի»,- Դենա Ուայթի խոսքը մեջբերում է Complex-ը։
Հիշեցնենք, որ 29-ամյա Ծառուկյանը UFC-ում նախորդ մենամարտն անցկացրել է նոյեմբերի 22-ին՝ խեղդող հնարքով հաղթելով Դեն Հուկերին։ Հայ մարտիկը խառը մենամարտերում մասնակցել է 26 հանդիպման, տարել 23 հաղթանակ ու կրել 3 պարտություն։
Հունվարի 25-ին Լոս Անջելեսում կայանալիք UFC 324 մրցաշարում UFC-ի թեթև քաշային կարգի ժամանակավոր չեմպիոնի տիտղոսի համար մենամարտելու են ամերիկացի Ջասթին Գեյջին ու բրիտանացի Փեդի Փիմբլեթը։ Գործող չեմպիոն Իլյա Տոպուրիան ժամանակավորապես հրաժարվել է տիտղոսը պաշտպանելուց։
