Կառավարությունը փոփոխություն է առաջարկում ավագանու անդամների հրաժարականի կարգում

Եթե եռօրյա ժամկետում ավագանու անդամները հետ չվերցնեն մանդատից հրաժարվելու մասին իրենց դիմումները, միայն այդ դեպքում կարող են դադարեցվել նրանց լիազորությունները։ Այս նախագիծն ընդգրկված է Կառավարության՝ հունվարի 15-ի նիստի օրակարգում։

Գործող օրենքով՝ ընտրատարածքային ընտրական հանձնաժողովը ավագանու անդամի հրաժարականի դիմումը ստանալուց հետո յոթ աշխատանքային օրվա ընթացքում կազմում է լիազորությունները դադարեցնելու մասին արձանագրություն։

Նախագծում նշվում է, որ երբ համայնքի ղեկավարը կամ նրա պաշտոնակատարը ավագանու անդամի հրաժարականի դիմումը ստանալուց անմիջապես հետո՝ եռօրյա ժամկետը չլրացած, արձանագրության հետ միասին այն փոխանցում է ընտրատարածքային ընտրական հանձնաժողով և անմիջապես կազմվում է լիազորությունների դադարեցման մասին արձանագրություն։ Նման զարգացումը, ըստ հիմնավորման, ավագանու անդամին զրկում է հրաժարականի դիմումը եռօրյա ժամկետում հետ վերցնելու՝ նախագծով նախատեսվող իրավունքից։

«Տեղական ինքնակառավարման մասին» օրենքի 26-րդ հոդվածի 3.1-ին մասով համանման կարգավորում արդեն իսկ նախատեսված է համայնքի ղեկավարի համար։ Մասնավորապես, համայնքի ղեկավարը հրաժարականի մասին իր դիմումը կարող է եռօրյա ժամկետում հետ վերցնել, իսկ այդ ժամկետում դիմումը հետ չվերցնելու դեպքում աշխատակազմի քարտուղարը համայնքի ավագանուն ծանուցելուց հետո կազմում է լիազորությունների վաղաժամկետ դադարեցման մասին արձանագրություն։

Հաշվի առնելով այս կետը՝ օրենքի նախագծով առաջարկվում է, որ աշխատակազմի քարտուղարը ավագանու անդամի լիազորությունների վաղաժամկետ դադարեցման մասին արձանագրությունը կազմի միայն այն դեպքում, երբ ավագանու անդամը եռօրյա ժամկետում հետ չի վերցրել իր հրաժարականի դիմումը։

Նախագծում նշվում է նաև, որ որ համամասնական ընտրակարգով ընտրված ավագանու անդամի հրաժարականի վերաբերյալ ներկայացված առաջարկությունը վերաբերում է նաև «Երևան քաղաքում տեղական ինքնակառավարման մասին» օրենքում լրացում կատարելու մասին օրենքի նախագծին։

Արփի Հակոբյան