Եթե այստեղ հասել ենք, կարող ենք մեծ հաջողություններ ունենալ․ ԿԳՄՍ նախարարը՝ ֆուտզալի Հայաստանի հավաքականին

Պատմության ընթացքում առաջին անգամ ֆուտզալի Հայաստանի հավաքականը կմասնակցի Եվրոպայի առաջնության եզրափակիչ փուլին: Մրցաշարը տեղի կունենա հունվարի 21-ից փետրվարի 7-ը Լատվիայում, Լիտվայում և Սլովենիայում: ՀՀ կրթության, գիտության, մշակույթի և սպորտի նախարար Ժաննա Անդրեասյանը ՀՖՖ նախագահ Արմեն Մելիքբեկյանի հետ այսօր հանդիպել է ֆուտզալի Հայաստանի ազգային հավաքականի խաղացողներին և մարզչական շտաբին: Այս մասին տեղեկացնում են ԿԳՄՍՆ-ից։

Ժաննա Անդրեասյանը, ողջունելով մարզիկներին, նշել է՝ տարիներ առաջ դժվար կլիներ հավատալ այն հաջողությանը, որն այսօր գրանցել է ազգային ընտրանին։

«Առաջին հերթին ձեր աշխատանքի, համատեղ ջանքի շնորհիվ ցույց եք տվել, որ դա հնարավոր է, ու եթե այստեղ հասել ենք, ուրեմն կարող ենք ավելի մեծ հաջողություններ ունենալ։ Վստահ եմ՝ ձեր մոտիվացիան, էներգիան ու թիմային միջավայրն այդ հնարավորություններն ընձեռում են»,- ասել է ԿԳՄՍ նախարարն ու հաջողություն մաղթել նրանց առաջիկա մրցաշարում:

ՀՖՖ նախագահ Արմեն Մելիքբեկյանը նշել է․ «Հաշվի առնելով այն ճանապարհը, որն անցել է ֆուտզալի Հայաստանի ազգային հավաքականն այս տարիների ընթացքում, ես բացարձակ չեմ կասկածում, որ ամենակարևորը, ինչ մենք կտեսնենք, նվիրումն է»:
Ֆուտզալի Հայաստանի ազգային հավաքականը ԵՎՐՈ-2026-ում առաջին հանդիպումը կանցկացնի հունվարի 22-ին Ուկրաինայի հետ։ Երկրորդ տուրում մեր թիմը կհանդիպի Չեխիայի ընտրանուն, իսկ խմբային փուլի վերջին խաղում Ռուբեն Նազարեթյանի թիմի մրցակիցը Լիտվայի հավաքականն է։