Կիևում իրավիճակն ամենածանրն է պատերազմի սկզբից ի վեր. Կլիչկո

Կիևում իրավիճակը չափազանց բարդ  է։ Լայնածավալ պատերազմի չորս տարվա ընթացքում առաջին նման մասշտաբի դեպքն է։ Տելեգրամում այս մասին գրել է Կիևի քաղաքապետ Վիտալի Կլիչկոն, նշում է BBC-ի ռուսական ծառայությունը։

Կիևում մի քանի օր է՝ ռուսական լայնածավալ օդային հարվածից հետո էլեկտրաէներգիայի, ջեռուցման և ջրի անջատումներ են։ Քաղաքում էլեկտրաէներգիայի արտակարգ անջատումներ են տեղի ունենում, հարվածից հետո հազարավոր տներ մնում են առանց ջեռուցման։

«Այսօրվա դրությամբ՝ Կիևում շուրջ 400 բազմահարկ շենքեր մնում են առանց ջեռուցման։ Մենք նախատեսում ենք այսօր երեկոյան վերականգնել այս 400 շենքերի մի քանիսի ջեռուցումը»,- ասել է Կլիչկոն։

Նա նշել է, որ ջեռուցման հետ կապված իրավիճակն աջ ափին արդեն ավելի կայուն է, ձախ ափին ավելի բարդ է։

«Էլեկտրաէներգիայի մատակարարման հետ կապված իրավիճակը, որը կարևոր է հանրային կոմունալ ծառայությունների համար, շարունակում է մնալ մարտահրավերային»,- ասել է Կլիչկոն՝ հավելելով, որ Կիևն ապրում է էլեկտրաէներգիայի արտակարգ անջատումների գրաֆիկով։

ДТЭК էներգետիկ ընկերությունը չորեքշաբթի հայտնել է, որ Կիևի բնակիչները շուրջ երեք ժամ են անցկացնում լույսի ներքո, առանց էլեկտրաէներգիայի են անցկացնում մինչև 10 ժամ։

Ուկրաինայի վարչապետ Յուլիա Սվիրիդենկոն չորեքշաբթի Գերագույն Ռադայում ունեցած ելույթի ժամանակ հայտարարել է, որ Կիևում էլեկտրաէներգիայի անջատումների իրավիճակը կարող է բարելավվել արդեն հունվարի 15-ի երեկոյան, եթե ռուսական կողմը հետագա հարվածներ չհասցնի։

Թարգմանությունը՝ Էմմա Չոբանյանի