03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Օվերչուկը հայտնել է Ադրբեջանի տարածքով Հայաստան արտահանումն ընդլայնելու ծրագրերի մասին
Քաղաքականություն
24.12.2025 | 13:29
Ռուսաստանը նախատեսում է Ադրբեջանով բացված երկաթուղային երթուղով Հայաստան մատակարարել նաև այլ ապրանքներ, մասնավորապես, պարարտանյութեր։ «Ռոսիա 24» հեռուստաալիքին այս մասին ասել է ՌԴ փոխվարչապետ Ալեքսեյ Օվերչուկը, գրում է Ինտերֆաքսը։
«Վերջերս տեղի ունեցավ շատ կարևոր իրադարձություն՝ մենք ունեցանք ռուսական հացահատիկ տեղափոխող առաջին գնացքը Ադրբեջանի և Վրաստանի տարածքի միջով դեպի Հայաստան։ Այսինքն՝ ավելի քան 30 տարվա ընթացքում, Հայաստանի ու Ադրբեջանի անկախացումից ի վեր առաջին անգամ անցավ հացահատիկ տեղափոխող գնացքը։ Դա ռուսական հացահատիկ էր, ապա՝ ղազախական հացահատիկ։ Մենք նաև քննարկում ենք այս գիծը այլ տեսակի բեռներով, պարարտանյութերով բեռնելու հնարավորությունը»,- ասել է նա՝ հավելելով, որ Ադրբեջանը միաժամանակ սկսել է իր սեփական մատակարարումները Հայաստան՝ ուղարկելով նավթամթերքով գնացք։
Օվերչուկի խոսքով՝ Ռուսաստանն ու Հայաստանը քննարկում են երկկողմ մատակարարումների ընդլայնումը հայկական ներմուծման հաշվին. «Խոսքն այն մասին է, որ ապահովվեն Հայաստանից Ռուսաստան հակադարձ առաքումներն Ադրբեջանի միջոցով»։
Ռուսաստանը հացահատիկի առաջին խմբաքանակը Հայաստան է մատակարարել 2025 թվականի նոյեմբերի սկզբին՝ Ադրբեջանի միջով անցնող նոր երկաթուղային երթուղով։ Ռուսաստանի գյուղատնտեսության նախարարության տվյալներով՝ մատակարարվել է 1000 տոննա երրորդ կարգի ցորեն։
Ընդհանուր առմամբ, Հայաստանը տարեկան ներմուծում է մոտավորապես 450,000-500,000 տոննա հացահատիկ։ Նախկինում արտահանումը հիմնականում իրականացվում էր ավտոմոբիլային ճանապարհով՝ ցամաքային սահմանային անցակետով և ծովային ճանապարհով՝ վրացական նավահանգիստներով։ Նոր երթուղին (Ադրբեջանի և Վրաստանի միջով) նվազեցնում է տրանսպորտային ծախսերը և բարելավում մատակարարումների կայունությունը, նշել է ՌԴ Գյուղատնտեսության նախարարությունը։
Թարգմանությունը՝ Էմմա Չոբանյանի
