Տնտեսություն
19.12.2025 | 18:20
Առողջապահության ոլորտում գրանցվել է 3.4%, տրանսպորտում՝ 4.7%, կապի ծառայություններում՝ 0.1% գնաճ։ Այս մասին Factor.am-ը տեղեկանում է ՀՀ վիճակագրական կոմիտեում հրապարակված տվյալներից։
Հանգստի և մշակույթի ոլորտում գներն աճել են 1.5%-ով, իսկ կրթության ոլորտում՝ 8%-ով։ Ռեստորանների և հյուրանոցների ծառայությունների գները բարձրացել են 1.9%-ով, մինչդեռ տարբեր ապրանքների և ծառայությունների գները նվազել են 0.3%-ով։
Ոչ պարենային ապրանքների գները նոյեմբերին 2024 թվականի նոյեմբերի համեմատ աճել են 1.2%-ով, իսկ հոկտեմբերի համեմատ՝ 0.5%-ով։ Բենզինի և դիզելային վառելիքի գները նոյեմբերին հոկտեմբերի համեմատ նվազել են համապատասխանաբար 0.6% և 1.6%-ով։
Ծառայությունների ոլորտում 2024 թվականի նոյեմբերի համեմատ այս տարի սակագներն աճել են 2.9%-ով, իսկ հոկտեմբերի համեմատ գրանցվել է 0.1% նվազում։
Բնակարանային ծառայությունների, ջրի, էլեկտրաէներգիայի, գազի և այլ վառելիքի գները աճել են 0.8%-ով, իսկ տնային գործածության առարկաների, կենցաղային տեխնիկայի և բնակարանի ընթացիկ սպասարկման գները նվազել են 0.1%-ով։
Անի Թամրազյան
