Ուկրաինան հայտնել է Նովոռոսիյսկի նավահանգստում ռուսական սուզանավին հարվածելու մասին. ՏԵՍԱՆՅՈՒԹ

Ուկրաինայի անվտանգության ծառայությունը նախօրեին հայտնել է, որ «Sub Sea Baby» ստորջրյա անօդաչու սարքերը Նովոռոսիյսկի նավահանգստում հարվածել են ռուսական 636.3 դասի «Վարշավյանկա» սուզանավին: Ասվում է, որ սուզանավը «կրել է լուրջ վնաս և գործնականում շարքից դուրս եկել », գրում է Current time-ը:

Նշվում է, որ սուզանավը տեղափոխում էր «Կալիբր» թևավոր հրթիռների չորս արձակիչ, որոնք Ռուսաստանը օգտագործում է Ուկրաինայի տարածքի վրա հարձակվելու համար։ Սուզանավը նախկինում տեղակայված էր Սևաստոպոլում՝ բռնակցված Ղրիմի տարածքում, բայց տեղափոխվել է Նովոռոսիյսկ՝ «Sea Baby մակերևութային ծովային անօդաչու թռչող սարքերի հաջող հատուկ գործողությունների շնորհիվ»։ Հարձակման ճշգրիտ ամսաթիվը չի նշվել։ Այս հաղորդագրությունից մի քանի ժամ անց Ռուսաստանի Սևծովյան նավատորմի ներկայացուցիչները հաստատեցին ստորջրյա անօդաչու թռչող սարքի միջոցով հարձակման փաստը, սակայն հայտարարեցին, որ այն «չի հասել իր նպատակներին»։

«Նովոռոսիյսկի ռազմածովային բազայի ծոցում տեղակայված Սևծովյան նավատորմի ոչ մի նավ կամ սուզանավ, ինչպես նաև դրանց անձնակազմերը չեն տուժել դիվերսիայի հետևանքով և գործում են բնականոն ռեժիմով»,- «Ինտերֆաքս»-ը մեջբերում է Ռուսաստանի Սևծովյան նավատորմի մամուլի ծառայության ղեկավար Ալեքսեյ Ռուլևի խոսքերը։

Ռուսաստանի պաշտպանության նախարարությունը ևս  մեկնաբանել է Ուկրաինայի անվտանգության ծառայության պնդումները։

«Նովոռոսիյսկի Սևծովյան նավատորմի ռազմածովային բազայի ծոցում ռուսական սուզանավերից մեկի ենթադրյալ «ոչնչացման» մասին Ուկրաինայի հետախուզական ծառայությունների կողմից տարածված տեղեկատվությունը չի համապատասխանում իրականությանը», – հայտարարել է Ռուսաստանի պաշտպանության նախարարությունը։

Թարգմանությունը՝ Էմմա Չոբանյանի