Լուկաշենկոն ներում է շնորհել Մարիա Կոլեսնիկովային, նա ազատության մեջ է

Բելառուսում քաղբանտարկյալ Մարիա Կոլեսնիկովան ազատ է արձակվել։ Այս մասին գրում է «Զերկալո»-ն՝ հղում անելով նրա քրոջը՝ Տատյանա Խոմիչին, որը Մարիայի հետ հեռախոսով է զրուցել։

Լուկաշենկոյի մամուլի ծառայության հետ կապ ունեցող Telegram-ի ալիքը հայտնում է, որ որոշում է ընդունվել ներում շնորհելու «տարբեր երկրների 123 քաղաքացիների»՝ կալիումի արդյունաբերությամբ զբաղվող «Բելառուսկալի»-ի նկատմամբ կիրառված պատժամիջոցների վերացման դիմաց։

«ԱՄՆ նախագահ Դոնալդ Թրամփի հետ ձեռք բերված պայմանավորվածությունների շրջանակում և նրա խնդրանքով, Բելառուսի Հանրապետության կալիումի արդյունաբերության դեմ նախկին ԱՄՆ նախագահ Ջո Բայդենի վարչակազմի կողմից կիրառված անօրինական պատժամիջոցների չեղարկման կապակցությամբ, ինչպես նաև Բելառուսի Հանրապետության դեմ կիրառված այլ անօրինական պատժամիջոցների վերացման գործընթացի գործնական փուլ անցնելու պայմաններում, պետության ղեկավարի կողմից որոշում է ընդունվել ներում շնորհելու տարբեր երկրների 123 քաղաքացիների, որոնք դատապարտվել են Բելառուսի Հանրապետության օրենքների համաձայն՝ տարբեր ուղղվածության հանցագործությունների համար՝ լրտեսական, ահաբեկչական և ծայրահեղական գործունեության»,-նշվել է հաղորդագրության մեջ։

Կոլեսնիկովան բելառուսական ընդդիմության ամենահայտնի գործիչներից մեկն է, քաղաքական ակտիվիստ։ 2020 թվականին Բելառուսում նախագահական ընտրություններից առաջ Մարիա Կոլեսնիկովան դարձավ ընդդիմադիր շարժման առանցքային դեմքերից մեկը։ Նա ընդգրկված էր այսպես կոչված «կանանց եռյակում»՝ Սվետլանա Տիխանովսկայա, Վերոնիկա Ցեպկալո, Մարիա Կոլեսնիկովա։

2020թ. սեպտեմբերին Կոլեսնիկովան ձերբակալվել է։ Նրան մեղադրել են «իշխանությունը զավթելու փորձի», «սահմանադրական կարգի խախտման կոչերի» համար։ 2021-ին դատապարտվել է 11 տարվա ազատազրկման։

Միջազգային իրավապաշտպան կազմակերպությունները նրան քաղաքական բանտարկյալ են ճանաչել։